Հասարակություն
28.05.2022 | 14:02Զինվորականին հատուկ կեցվածքով ու հոգեբանությամբ Տավուշի մարզի մի քանի գյուղերի դպրոցականները 4 ամիս ուսանել են և ձեռք բերել մարտ վարելու հմտություններ։ Աշակերտները սովորել են ինքնապաշտպանություն, առաջին բուժօգնություն, մարտավարություն, ձեռք են բերել տեղանքում կողմնորոշվելու հմտություններ։
«Բերդ» հայրենակցական միության նախաձեռնած դասընթացները թեև 8-րդ և բարձր դասարանի աշակերտների համար են, բայց շարքերում նաև ավելի փոքրերի նկատեցինք։ Դավիթը, օրինակ, 3-րդ դասարանցի է, համառել է, որ ինքն էլ պետք է մասնակցի, և չեն մերժել։
«Եթե հնարավորությունը կար, ասացի՝ ինչի՞ չանեմ։ Հիմա սովորել եմ, թե ինչ պետք է անեմ, եթե շրջափակել են, ու որ պահին էլ պետք լինի, ես զենք եմ վերցնելու և գնամ կռվի»,- Factor TV-ի հետ զրույցում ասաց Դավիթը։
Ծրագրի մասնակիցների շարքերում նաև աղջիկներ կան։ Մարզիչ-հրահանգիչների մի մասն էլ կանայք են, որ հմտությունները ձեռք են բերել՝ հենց այս դասընթացներն անցկացնելու նպատակով։
Երեխաները մեկ ժամից ավելի ցուցադրեցին իրենց սովորածն ու արժանացան գովեստի խոսքերի միջոցառմանը մասնակցելու համար Բերդ եկած հյուրերի կողմից, որոնք նաև խորհուրդներ տվեցին։
Աշակերտների մոտ հետաքրքրությունն այնքան մեծ է, որ ցածր դասարանցիները հաճախ հեռվից հետևում են դասերին՝ սպասելով իրենց հերթին։ Դասընթացները շարունակական են լինելու։
Մանրամասները՝ տեսանյութում։
Սաթենիկ Հայրապետյան
