Ինչո՞ւ բանակում չի ծառայել Արթուր Վանեցյանի որդին

ԱԱԾ նախկին տնօրեն Արթուր Վանեցյանի որդին՝ Արտյոմ Վանեցյանը, պարտադիր զինվորական ծառայություն չի անցել: Տեղեկությունը Factor.am-ի գրավոր հարցմանն ի պատասխան հայտնել են Հայաստանի պաշտպանության նախարարությունից: Գերատեսչությունից նշել են, որ Վանեցյանի որդին պարտադիր զինվորական ծառայությունից ազատվել է օրենքով սահմանված հիմքերով՝ հրաժարվելով այլ մանրամասներ տրամադրել:

Արցախի փրկության կարգախոսով շուրջ 1 ամիս փողոցային պայքարի դուրս եկած Վանեցյանը մեզ հետ զրույցում այս առնչությամբ ասաց. «Որդիս ազատվել է որոշակի առողջական խնդիրներից ելնելով, որոնց մասին չեմ ցանկանում բարձրաձայնել: Բազմաթիվ ՀԿ-ներ և պաշտոնյաներ կան, թող որևէ մեկը դիմի, գնան իրար հետ նոր բժշկական հետազոտություն անցկացնեն: Եթե կգտնեն, որ իր մոտ ամեն ինչ նորմալ է ու ինքը չի ծառայել, այդ ժամանակ նոր կարող են խոսել այն մասին, որ խուսափել է: Երբ բժշկական եզրակացությունը եղել է, որ ինքը պետք է ազատվի, որդիս առանց ինձ հետ խորհրդակցելու, նամակով դիմել է ՊՆ նախարար Դավիթ Տոնոյանին և ասել է, որ բժշկական հետազոտության արդյունքերի հետ համաձայն չեմ, խնդրում եմ կրկնակի հետազոտություն: Կրկնակի բժշկական հետազոտություն է անցկացվել, որից հետո կրկին մերժվել է բանակ զորակոչումը»,- նշեց Վանեցյանը:

Հիշեցնենք՝ Factor.am-ը պարբերաբար անդրադառնում է պաշտոնյաների և նրանց որդիների՝ բանակում չծառայելու փաստերին: 2021 թվականի ընտրություններից հետո անդրադարձել էինք իշխանության և խորհրդարանական ընդդիմության՝ պարտադիր զինվորական ծառայություն չանցած պաշտոնյաներին:

Նարեկ Կիրակոսյան