Քաղաքականություն
04.05.2022 | 15:55
Թուրքիայում Ուկրաինայի դեսպան Վասիլ Բոդնարն ասել է, որ Ուկրաինայի նախագահ Վլադիմիր Զելենսկիի վերջին հայտարարությունները, որոնք Անկարային ուղղված որոշ քննադատություններ էին ներառում Ռուսաստանի և Ուկրաինայի հետ հարաբերություններում երկակի ստանդարտների համար, հանվել են կոնտեքստից՝ փորձելով փչացնել թուրք-ուկրաինական հարաբերությունները, գրում են թուրքական լրատվամիջոցները։
Հիշեցնենք, որ Ուկրաինայի նախագահ Վլադիմիր Զելենսկին քննադատել էր Հունաստանին և Թուրքիային, որոնք հյուրընկալում են ռուս զբոսաշրջիկներին, կոչ անելով հրաժարվել երկակի ստանդարտներից։
«Ռուսական զբոսաշրջությունը շատ ու շատ տարիներ է, ինչ մեծ գումարներ է բերում Հունաստանին։ Մենք կարծում ենք, որ նրանք արյան վրա են վաստակում։ Նույն իրավիճակն է Թուրքիայում։ Թուրքիան մի կողմից հանդես է գալիս որպես միջնորդ և կարևոր քայլերով աջակցում է Ուկրաինային, իսկ մյուս կողմից՝ մենք տեսնում ենք զբոսաշրջային երթուղիների մշակում հատուկ ռուսական զբոսաշրջության համար։ Դա անհնար է, եթե մենք ցանկանում ենք ունենալ բարեկամական հարաբերություններ»,- ասել էր Զելենսկին։
Այս հայտարարություններից հետո Զելենսկին կառավարամետ շրջանակների քննադատությանն ու դժգոհությանն է արժանացել։
ՆԱՏՕ-ի անդամ Թուրքիան, որը բարեկամական կապեր ունի ինչպես Ռուսաստանի, այնպես էլ Ուկրաինայի հետ, միջնորդում է դադարեցնել շարունակվող պատերազմը, որը սկսվել է փետրվարի 24-ին։
Անկարայում Ուկրաինայի դեսպանը հայտարարության մեջ ասել է, որ միտումնավոր ջանքեր են գործադրվում Ուկրաինայի նախագահի հայտարարությունները կոնտեքստից հանելու՝ ուկրաինա-թուրքական ռազմավարական գործընկերությունը ստվերելու համար։ Նա նշել է, որ Զելենսկին երախտապարտ է նախագահ Ռեջեփ Թայիփ Էրդողանին իր քաղաքական աջակցության համար և բարձր է գնահատում Թուրքիայի ջանքերը՝ դադարեցնելու ռուսական ագրեսիան և հետամուտ լինելու խաղաղության պահպանմանը։
Հավելենք, որ չնայած Արևմուտքի հորդորներին՝ Թուրքիան հրաժարվում է ՌԴ-ի դեմ պատժամիջոցներ սահմանել, հակառակը՝ ամեն կերպ երկրում խրախուսում է ռուսական բիզնեսի մուտքն ու հյուրընկալում պատժամիջոցների տակ հայտնված ռուս օլիգարխներին։
Էմմա Չոբանյան
