Ռուս լրագրող Ալեքսանդր Նևզորովի նկատմամբ քրեական գործ է հարուցել «ռազմական կեղծիքի» հոդվածով

Ռուս լրագրող Ալեքսանդր Նևզորովը քրեական պատասխանատվության է ենթարկվել «ռազմական կեղծիքների» համար, հայտնում է ՌԴ Քննչական կոմիտեն։ Պատճառը Մարիուպոլի ծննդատան հրետակոծության մասին հրապարակումն է։ Ավելի վաղ հայտնի էր դարձել առնվազն յոթ քրեական գործի մասին, որոնք հարուցվել են Քրեական օրենսգրքի այս նոր հոդվածով, որն ընդունվել է Ուկրաինա ռուսական ներխուժումից հետո։ Այդ հոդվածով առաջին անգամ մեկ մարդ է ձերբակալվել, գրում է BBC-ի ռուսական ծառայությունը։

Նևզորովի գործողությունները «դիտվում են որպես հանցագործության նշաններ Ռուսաստանի Դաշնության Քրեական օրենսգրքի 207.3-րդ հոդվածի 2-րդ մասի «ե» կետով (հանրային տարածում Զինված ուժերի գործողությունների մասին սուտ տեղեկությունները ճշմարիտի տեղ ներկայացնելը)», ասվում է ՌԴ Քննչական կոմիտեի հաղորդագրության մեջ:

Ըստ քննիչների՝ մարտի 9-ին լրագրողը Instagram-ում (սոցցանցը նախօրեին արգելվել է Ռուսաստանում՝ դիտարկվելով որպես ծայրահեղական) և YouTube-ում հրապարակել է «միտումնավոր կեղծ տեղեկատվություն ռուսական բանակի կողմից Մարիուպոլի ծննդատան դիտավորյալ գնդակոծության մասին»։

«Հրապարակումներն ուղեկցվել են գնդակոծությունից տուժած խաղաղ բնակիչների ոչ հավաստի լուսանկարներով: Այդ նկարների տարածման աղբյուրն ուկրաինական լրատվամիջոցներն են: ՌԴ Պաշտպանության նախարարությունը պաշտոնապես հայտարարել է նշված տեղեկատվության կեղծ լինելու մասին»,- ասում է մամուլի հաղորդագրությունում։

Դրա համաձայն՝ հետաքննությունը պարզում է Նևզորովի գտնվելու վայրը՝ «նրա հետ քննչական և դատավարական գործողություններ իրականացնելու նպատակով»։ Թե որտեղ է այժմ Նևզորովը, պարզ չէ։ Հայտնի է միայն, որ մարտի 18-ին նա Իսրայելում էր։ Իր Telegram-ի ալիքում լրագրողը վերահրապարակել է քրեական գործի հարուցման մասին լուրը։

Տաթև Ֆռանգյան