10.10.2026 | 15:55
Հոկտեմբերի 13-ից Հայաստանում սպասվում է անձրև և ամպրոպ
Վարչապետի աշխատակազմի ղեկավարը այցելել է Կարեն Դեմիրճյանի անվան մարզահամերգային համալիր, ծանոթացել բարեկարգման աշխատանքների ընթացքին
Հասարակություն
27.04.2022 | 19:30
Վարչապետի աշխատակազմի ղեկավար Արայիկ Հարությունյանն այսօր այցելել է Կարեն Դեմիրճյանի անվան մարզահամերգային համալիր, ծանոթացել բռնցքամարտի Եվրոպայի առաջնության, եվրատեսիլյան մրցույթի անցկացման նպատակով համալիրի շենքում իրականացվող շինարարական, վերականգնողական և բարեկարգման աշխատանքների ընթացքին: Հաջորդ տարի Հայաստանում ակնկալվում է ևս մեկ մարզական մեծ միջոցառում՝ ծանրամարտի Եվրոպայի առաջնությունը:
Պատասխանատուների ներկայացմամբ, այս տարի մարտի 13-ին մեկնարկած աշխատանքների արդյունքում արդեն իսկ վերանորոգվել են համերգային և սպորտային դահլիճներին կից հանդերձարաններն ու միջանցքները, ջրամեկուսացվել են պատշգամբները: Համալիրի շենքի ճակատային մասերում, գլխավոր ճակատի տանիքին, աջ և ձախ թևի տանիքներին հարող հատվածներում և արտաքին երեսպատման աշխատանքներում իրականացվել են կոսմետիկ նորոգման աշխատանքներ: Առաջիկայում փոխարինվելու են հին վերելակները, վերանորոգման փուլում են գտնվում շոգեբաղնիքները, փոխվելու են բոլոր ցնցուղներն ու ծորակները:
Արայիկ Հարությունյանը կարևորել է աշխատանքների ժամանակին և որակյալ իրականացումն ու ընդգծել, որ մարզահամերգային համալիրում տեղի ունենալիք միջազգային միջոցառումները պետք է կազմակերպվեն ու անցկացվեն բարձր մակարդակով:
