06.10.2026 | 14:52
ՀԾԿՀ-ում քննարկվել է «Firebird AI» տվյալների կենտրոնի էլեկտրամատակարարումը
Աղմկահարույց միջադեպ՝ Արցախի դրոշի շուրջ. ինչու են ներկել Ֆրանսիայի հրապարակում տեղադրված դրոշը․ ՏԵՍԱՆՅՈՒԹ
Քաղաքականություն
08.04.2022 | 20:02
Թեժ կրքեր՝ Արցախի դրոշի շուրջ․ Ֆրանսիայի հրապարակում օրեր առաջ տեղադրված Արցախի Հանրապետության դրոշի վրայի սպիտակ զարդանախշն այսօր Ազգային ժողովրդավարական բևեռի մի խումբ ակտիվիստներ ներկել են՝ նմանացնելով ՀՀ դրոշին:
«Մեկ պետություն՝ մեկ դրոշ» խորագրով ակցիայի մասնակիցները նշում են, որ Արցախի դրոշը, այսպես կոչված, պառակտման խորհրդանիշ է՝ Արցախը բաժանում է Հայաստանից, քանի որ, ըստ նրանց, Արցախը Հայաստանի մաս է, ինչպես մյուս վարչատարածքային միավորները:
Հիշեցնենք՝ Արցախի դրոշը Երևանի Ֆրանսիայի հրապարակում տեղադրվել էր ապրիլի 5-ին խորհրդարանական ընդդիմության կազմակերպած հանրահավաքից հետո: Այսպիսով ԱԺ «Հայաստան» և «Պատիվ ունեմ» խմբակցություններն ուշադրություն էին հրավիրել Արցախի կարգավիճակի խնդրի վրա:
Ազգային ժողովրդավարական բևեռի ներկայացուցիչների կողմից Արցախի դրոշը ներկելուց ժամեր անց Դաշնակցության անդամներն Արցախի նոր դրոշ են տեղադրել Ֆրանսիայի հրապարակում: ՀՅԴ ներկայացուցիչ Գեղամ Մանուկյանը պնդում է՝ պղծվել է Արցախի դրոշը:
«Թուրքիայի և Ադրբեջանի աչքի գրող համարվող Արցախի դրոշի նկատմամբ Հայաստանի որևէ քաղաքացու կողմից ոտնձգություն է կատարվում, ես կդժվարանամ քաղաքական ուժ ձևակերպումը տալ: Ցանկացած բանական մարդու դժվար է մեկնաբանություն տալ այս վայրագ գործողությանը»,- ասում է Գեղամ Մանուկյանը։
Ազգային ժողովրդավարական բևեռի խորհրդի անդամ Վարուժան Ավետիսյանն այլ կերպ է մեկնաբանում իրենց ակցիան: Ըստ նրա՝ Արցախի դրոշը տեղադրելով՝ Արցախն անջատում են Հայաստանից և նվիրում Ռուսաստանին:
Վարուժան Ավետիսյանի խոսքով՝ իրենց քաղաքական ուժը մշտապես պայքարել է այն գաղափարի համար, որ Արցախի դրոշ չկա և չի կարող լինել, քանի որ Արցախը Հայաստանի մաս է, ինչպես Սյունիքն ու Շիրակը:
Հայաստանի Գլխավոր դատախազությունն Արցախի Հանրապետության պետական դրոշը ներկելու տեսանյութն ուղարկել է ոստիկանություն՝ քրեադատավարական կարգով նյութեր նախապատրաստելու, դրա շրջանակում դեպքի հանգամանքները պարզելու և հետագա ընթացքը որոշելու հանձնարարությամբ:
Հայաստանում Արցախի մշտական ներկայացուցչությունը խստորեն դատապարտել է դրոշի ներկումը՝ դա համարելով անհարգալից վերաբերմունք։
«Կոչ ենք անում բոլոր ուժերին և քաղաքացիներին քաղաքական դիրքորոշում արտահայտելիս զերծ մնալ պետական խորհրդանիշներն ապականելու հակաօրինական արարքներից»,- նշված է հայտարարությունում։
Ազգային ժողովրդավարական բևեռի խորհրդի անդամ Վարուժան Ավետիսյանը, մինչդեռ, չի բացառում, որ այսօրինակ ակցիաները շարունակական են լինելու:
Մանրամասները՝ տեսանյութում։
Նարեկ Կիրակոսյան
