Ուկրաինան բեկում է մտցրել ռազմաճակատում․ ՌԴ-ին չափազանց ծանր հետևանքի կբերի պատերազմը՝ անկախ պայմանագրից․ Արմեն Վարդանյան․ ՏԵՍԱՆՅՈՒԹ

Factor TV-ի հարցազրույցը քաղաքագետ Արմեն Վարդանյանի հետ

-Արցախում ռուս խաղաղապահներ են, մենք տեսնում ենք, թե ինչպես են նրանք պահում խաղաղությունն Արցախում և ինչպես են պաշտպանում այդ կարգը, որը պետք է ապահովվեր նոյեմբերի 9-ի հայտարարությամբ: Եթե Ռուսաստանի ջախջախման կամ ազդեցության թուլացման սցենարն է իրականացվում, նշանակում է՝ Ադրբեջանն այլևս ոչ թե մեկ բարձունքի համար է պայքարելու, այլ մինչև Ստեփանակերտ է ձգտելու: Սա հնարավո՞ր է բեկանել, թե՞ պետք է հույս դնել, որ ռուսները, անուամենայնիվ, կմնան Արցախում:

-Եթե խոսքը մեր անվտանգության մասին է, ապա պետք է բոլոր հնարավոր սցենարներին պատրաստ լինենք. անցած դարի ընթացքում երկու անգամ ռուս զինվորները հեռացան Հայաստանից՝ մեզ թողնելով անվտանգային լուրջ խնդրի առաջ։ Դրա համար մենք հույսներս մեզ վրա պետք է դնենք, արդիականացնենք մեր բանակը։

-Ո՞վ պետք է մեզ օգնի, մենք չենք կարող գերժամանակակից զենքեր արտադրել, մենք ՌԴ դաշնակիցն ենք, ՌԴ-ն Արցախում, լավ թե վատ, կայուն իրավիճակ է պահում, Արևմուտքն էլ ասում է՝ դուք ՀԱՊԿ անդամ ենք, և եթե ձեզ զինատեսակներ տանք, հնարավոր է՝ դրանք հայտնվեն ՌԴ-ի ձեռքում: Ռուսաստանը հայտնվում է պատժամիջոցների տակ, և հնարավորությունները նվազում են:

-Երկու ուղղությամբ պետք է աշխատենք. առաջինը՝ զարգացնենք սեփական ռազմարդյունաբերությունը, դրա համար ունենք գիտական ներուժ, երկրորդ՝ զուգահեռ պետք է գնումներ կատարենք: Իշխանությունը պետք է գոտիները ձգի, անիմաստ ծախսերը քչացնի և ռազմական տեխնիկա գնի: Արևմուտքն Ադրբեջանին էլ զենք չի վաճառվում, բայց զարտուղի ճանապարհներով գնել են որոշ զինատեսակներ։

-Համաձայն չե՞ք, որ ներկայում միջազգային անվտանգությունը միայն զենքը չէ, բանակները չեն, որ ապահովում են, չնայած դա առաջնային գործոնն է, նաև շահերի համադրումն է կարևոր:

-Միանշանակ՝ այո:

-Ինչ եք կարծում՝ Արևմուտքին ձեռնտո՞ւ է, որ Հայաստանը չկորցնի Արցախը, Ռուսաստանին ձեռնտո՞ւ է, որ Արցախը չլինի ադրբեջանական, երևի թե այս տիրույթում պետք է մեր անվտանգային խնդիրները դիտարկենք:

-Կարծում եմ՝ և՛ Արևմուտքին, և՛ Ռուսաստանին պետք չէ, որ Հայաստանը վերջնականապես կորցնի Արցախը: Վերջին ամիսներին և՛ ՀՀ-ում ԱՄՆ դեսպանը, և՛ Ֆրանսիայի դեսպանը, և՛ ԵՄ մի շարք այլ երկրների դեսպաններ հայտարարեցին, որ Արցախի հակամարտությունը դեռ չի լուծվել, կարգավիճակի հարցը պետք է քննարկվի: Նաև ՌԴ-ն չի ցանկանում, բայց այլ համատեքստում, Ռուսաստանին պետք է իր խաղաղապահներին ամեն գնով տեղակայել Արցախում, որպեսզի Հայաստանի և Ադրբեջանի վրա ճնշման գործիքներ ունենա, հիմա եթե Հայաստանն այնպիսի քայլեր անի, որոնք իր շահերից չեն բխում, կարող է Արցախում ադրբեջանցիների ձեռքով մեզ պատժել, և հակառակը՝ եթե Ադրբեջանն անի այնպիսի քայլեր, որոնք Կրեմլի սրտով չեն, մեզ որպես մահակ օգտագործի։

-Ապրիլի 6-ին Բրյուսելում հանդիպելու են Փաշինյանն ու Ալիևը, արդյո՞ք Հայասանը կստորագրի խաղաղության համաձայնագիրը:

-Հայաստանը չի ստորագրելու, ես դրանում վստահ եմ, այլ ժամանակ է ձգձգելու և վերջում այդ առաջարկությունները նետելու է աղբարկղը:

Հարցազրույցն ամողջությամբ՝ տեսանյութում:

Ռոբերտ Անանյան