Այսօրվանից գազը թանկանում է

Այսօրվանից բնական գազի համար ՀՀ քաղաքացիները կվճարեն նոր սակագնով։ Որոշումը կայացրել էր Հայաստանի հանրային ծառայությունները կարգավորող հանձնաժողովը՝ քննարկելով «Գազպրոմ Արմենիա» ընկերության կողմից սպառողներին վաճառվող բնական գազի սակագների սահմանման մասին հարցը: Սպառած գազի դիմաց Հայաստանի սպառողները մինչ այս տարբերակված սակագին էին վճարում, մասնավորապես՝ սոցիալապես անապահով խմբերը` 100 դրամ՝ 1 խմ-ի համար, իսկ մնացած բնակիչ-բաժանորդները` 139 դրամ` 1 խմ-ի համար, ամսական 10 հազար խորանարդ մետր գազ սպառող խոշոր սպառողները (տնտեսվարողները) 255.91 ԱՄՆ դոլարին համարժեք դրամ 1000 խմ համար։

ՀՀ հանրային ծառայությունները կարգավորող հանձնաժողովի նոր որոշմամբ սոցիալապես անապահով ընտանիքների համար բնական գազի սակագինը տարեկան մինչև 600 խորանարդ մետր բնական գազ սպառելու դեպքում չի փոխվի՝ 100 դրամ ամեն 1 խմ դիմաց։ Սոցիալապես անապահով ընտանիքներից բացի բնակչության մյուս խավերի համար բնական գազի համար սակագին է սահմանվել 143,7 դրամ ամեն 1 խմ դիմաց։ Գյուղատնտեսության ոլորտում գործունեություն իրականացնող ջերմոցային տնտեսություններին վաճառվող բնական գազի սակագինը նոյեմբերի 1-ից մինչև մարտի 31-ը ներառյալ ժամանակահատվածի համար կկազմի 233.9 ԱՄՆ դոլարին համարժեք դրամ` սպառված յուրաքանչյուր 1000 խմ բնական գազի համար։ Գյուղատնտեսության ոլորտի վերամշակող՝ պահածոների, խմիչքների և կաթնամթերքի արտադրությամբ զբաղվողները ևս կվճարեն 1000 խմ-ի դիմաց 233.9 ԱՄՆ դոլարին համարժեք դրամ։ Վերոնշյալ կետերով չնախատեսված մյուս սպառողներին վաճառվող բնական գազի սակագինը յուրաքանչյուր ամսում մինչև 10 հազար խորանարդ մետր բնական գազի համար՝ 143 700 դրամ և 10 հազար խորանարդ մետրը գերազանցող բնական գազի համար՝ 265.81 ԱՄՆ դոլարին համարժեք դրամ` սպառված յուրաքանչյուր հազար խմ բնական գազի համար։