Դիրքերից մեկում զինծառայողի մահվան դեպքով երկու անձ է ձերբակալվել

Մարտի 16-ին հարավ-արևելյան ուղղությամբ տեղակայված մարտական դիրքերից մեկում մահացած հայտնաբերված ժամկետային զինծառայող, շարքային Ալբերտ Լևոնի Սիրոյանի գործով երկու ձերբակալվածներ կան. Factor.am-ին հայտնեց ՀՀ քննչական կոմիտեի մամուլի խոսնակ Վարդան Թադևոսյանը:

Նրա փոխանցմամբ՝ ձերբակալվել են նույն գումարտակի մարտական դիրքի պարտադիր ժամկետային զինծառայող Ն. Ս.-ն և մարտական դիրքի պարտադիր ժամկետային, կրտսեր սերժանտ Վ. Ա.-ն:

Հիշեցնենք՝ 20-ամյա զինծառայողը հրազենային վնասվածք էր ստացել ինքնաձիգից կզակի շրջանում արձակած կրակոցից։ Հարուցվել էր քրեական գործ՝ դարձյալ զինծառայողին անզգուշությամբ ինքնասպանության հասցնելու հոդվածով։ Ալբերտը Արտաշատի Վարդաշեն համայնքից էր, բանակ էր զորակոչվել 2020 թվականի դեկտեմբերին, ծառայում էր Սյունիքի մարզում։

Շարքային Ալբերտ Սիրոյանի` հրազենային մահացու վիրավորում ստանալու դեպքի առթիվ հարուցված քրեական գործով մարտի 19-ին ձերբակալվել է մարտական դիրքի պարտադիր ժամկետային զինծառայող Ն.Չ.: Չութուլյանը կասկածվում է ՀՀ քրեական օրենսգրքի 359-րդ հոդվածի 1-ին մասով նախատեսված (Զինծառայողների փոխհարաբերությունների կանոնագրքային կանոնները խախտելը նրանց միջև ստորադասության հարաբերությունների բացակայության դեպքում, որն արտահայտվել է անձի պատիվն ու արժանապատվությունը ստորացնելով, նրան ծաղրուծանակի ենթարկելով կամ հալածելով կամ զուգորդվել է բռնություն գործադրելով) հանցագործության կատարելու մեջ:

Շարքային Ալբերտ Սիրոյանի մահվան դեպքի առթիվ հարուցված քրեական գործով մարտի 19-ին ձերբակալվել է նաև մարտական դիրքի պարտադիր ժամկետային ևս մեկ զինծառայող՝ կրտսեր սերժանտ Վահե Արայիկի Մարգարյանը: Վերջինս էլ կասկածվում է ՀՀ քրեական օրենսգրքի 375-րդ հոդվածի 1-ին մասով նախատեսված (Պետի կամ պաշտոնատար անձի կողմից իշխանությունը կամ պաշտոնեական դիրքը չարաշահելը, իշխանազանցությունը կամ պաշտոնեական լիազորությունների սահմանն անցնելը, ինչպես նաև իշխանության անգործությունը, եթե այդ արարքները կատարվել են շահադիտական, անձնական այլ շահագրգռվածությունից կամ խմբային շահերից ելնելով, և եթե դրանք էական վնաս են պատճառել (գույքային վնասի դեպքում` հանցագործության պահին սահմանված նվազագույն աշխատավարձի հինգհարյուրապատիկը գերազանցող գումարը կամ դրա արժեքը) նախատեսված հանցագործության կատարելու մեջ:

Արփի Հակոբյան