16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Արցախում գազամատակարարումը դեռևս չի վերականգնվել
16.03.2022 | 18:45
Factor.am-ի տեղեկություններով՝ Արցախի հանրապետությունում դեռևս չի վերականգնվել գազամատակարարումը։ Ինչպես մեզ հետ զրույցում հայտնեց պատկան մարմիններից մեկը՝ վերանորոգման աշխատանքները շարունակվում են, հնարավոր չէ ասել՝ այսօր կվերականգնվի՞, թե ոչ։
Հիշեցնենք՝ Արցախն արդեն 9 օր է զրկված է գազամատակարարումից, էլեկտրամատակարարումն էլ իրականացվում է խափանումներով։ Մարտի 8-ից ի վեր ՀՀ կառավարության ու ռուս խաղաղապահների աջակցությամբ իրականացվող բանակցությունների շնորհիվ՝ ադրբեջանական կողմն այսօր սկսել է վնասված գազատար խողովակի վերանորոգման աշխատանքները: Այս մասին հաղորդագրություն էր տարածել Արցախի տեղեկատվական շտաբը․
«Պայմանավորվածության համաձայն՝ գազամատակարարումը կարճ ժամկետում կվերականգնվի, և Արցախի իշխանությունները գործադրում են բոլոր ջանքերը, որ դա տեղի ունենա ժամ առաջ»,- նշվում է հայտարարության մեջ:
Ավելի վաղ՝ Արցախի մարդու իրավունքների պաշտպանի աշխատակազմի կողմից կատարված ուսումնասիրությունների և իրավապահ մարմինների հետ քննարկումների արդյունքում պարզվել էր, որ գազատարը վնասված է այն հատվածում, որը գտնվում է ադրբեջանական զինված ուժերի վերահսկողության տակ․
««Արցախգազ» ՓԲ ընկերության մասնագետները և իրավապահ մարմինները չեն կարողանում հստակ նշել՝ արդյո՞ք վթարը տեղի է ունեցել տեխնիկական պատճառներով, թե ադրբեջանական կողմի գործողությունների արդյունքում, պատճառն այն է, որ ադրբեջանական կողմը խոչընդոտում է և՛ Արցախի իրավապահների, և՛ գազամատակարարող ընկերության մասնագետների հասանելիությունը վթարի վայր։ Այս պահին վերականգնման աշխատանքները ևս չեն իրականացվում ադրբեջանական կողմից հարուցվող խոչընդոտների պատճառով»,- տարածած հաղորդագրության մեջ նշել էր Արցախի ՄԻՊ Գեղամ Ստեփանյանը։
Ռոզա Վարդանյան
