ՀՀ իշխանությունների կեցվածքը ճիշտ է. Խաչատուրյանը` ռուս-ուկրաինական պատերազմի մասին․ ՏԵՍԱՆՅՈՒԹ

Ռուս-ուկրաինական պատերազմի վերաբերյալ ՀՀ իշխանությունների հայտարարություններն ու պահվածքը ճիշտ է։ Այս մասին լրագրողների հետ ճեպազրույցում ասաց ՀՀ նախագահ ընտրված Վահագն Խաչատուրյանը։

«Ես գտնում եմ, որ այն կեցվածքը, պահվածքը և հայտարարությունները, որոնք արվում են Հայաստանի իշխանությունների կողմից, դա ամենաճիշտն է։ Մենք բոլորս պիտի հուսանք և հնարավորինս ամեն ինչ անենք, որ մեկ օր առաջ պատերազմն ավարտվի։ Մենք շատ լավ գիտենք, թե ինչ է դա նշանակում, մեր մաշկի վրա դա զգացել ենք»,- ասաց նա։

Տնտեսական առումով իրականում լրջագույն մարտահրավերներ ու խնդիրներ կան, ըստ Խաչատուրյանի, անկանխատեսելի երևույթներ կարող են տեղի ունենալ։ «Ոչ մի լավագույն տնտեսագիտական վերլուծություն կամ վերլուծաբան չէր կարող պատկերացնել, որ շատ կարճ ժամանակում մեր ամենամեծ տնտեսական գործընկերը՝ Ռուսաստանը կարող է հայտնվել այսպիսի լուրջ սահմանափակումների մեջ։ Եվ դրանից բխող հետևանքները մենք կանխատեսել մասամբ կարող ենք, բայց ամբողջապես չէ։ Ուղղակի պետք է կարողանանք մեր համակարգը պատրաստել, հատկապես ֆինանսական համակարգը, որպեսզի կարողանա և մեր քաղաքացիներին սպասարկել, և, ինչու չէ, նաև այն մարդկանց, ովքեր Հայաստան են ժամանել ու այստեղ ցանկանում են տնտեսական գործունեություն կազմակերպել։

Նորից եմ կրկնում՝ տնտեսագիտական ոչ մի չափանիշների մեջ չի մտնում այսօրվա ստեղծված իրավիճակը։ Եվ եթե փորձենք այդ տրամաբանության մեջ վերլուծական գնահատականներ տալ, այսօր կտանք, վաղը միանգամից դա կփոխվի։ Առանց այն էլ վերջին մեկ տարվա զարգացումները՝ համաշխարհային տնտեսական սահմանափակումները մի ուրիշ երևույթ էր, որին մենք ականատես եղանք՝ բարձր ինֆլյացիա և այլն։ Մինչև իքս ժամանակ, որը կարող է տևել մինչև տարվա վերջ, մենք դեռևս այս պրոբլեմներն ունենալու ենք։ Մեր Կենտրոնական բանկը օպերատիվ հետևում է, թ եինչ է տեղի ունենում միջազգային շուկաներում, որպեսզի կարողանան կառավարելի դարձնել մեր ֆինանսական համակարգը»,- նշեց Խաչատուրյանը:

Մանրամասները՝ տեսանյութում: