07.10.2026 | 23:48
Արթուր Դանիելյանը կալանավորվեց
Մարտի 15-ից ծխախոտի մի շարք փոխարինիչների օգտագործումը ևս կարգելվի հանրային սննդի վայրերում
09.03.2022 | 20:52
Այսօր Ազգային ժողովի արտահերթ նիստում քննարկվում էր ծխախոտային սահմանափակումներին առնչվող օրենքի նախագիծ։ Ըստ այդմ՝ 2020 թվականին ընդունված և աստիճանաբար ուժի մեջ մտնող կարգավորումների մեջ ծխախոտի և դրա փոխարինիչների՝ հանրային սննդի վայրերում օգտագործման արգելքին վերաբերող օրենքում առաջարկվեց որոշակի լրացում կատարել։
Դրանով սահմանված էր մարտի 15-ից ուժի մեջ մտնող հանրային սննդի վայրերում ծխախոտի որոշակի փոխարինիչների արգելքի շրջանակում ավելացնել ևս մեկը։ Բացի այն, որ արգելված է լինելու ծխախոտի մի շարք փոխարինիչների, այդ թվում՝ սիգարի, էլեկտրոնային ծխախոտի և դրա միջոցով լուծույթների կիրառումը, նախագծով առաջարկվում էր ավելացնել «նյութ» բառը։ Այս մասին ԱԺ ամբիոնից հայտնեց առողջապահության նախարարի առաջին տեղակալ Լենա Նանուշյանը։
«Խոսքը պինդ նյութի մասին է, որը վերջերս է ներմուծվել Հայաստան։ Նիկոտին պարունակող, ծխախոտային արտադրատեսակների շարքին դասվող ցանկացած միջոց, այդ թվում՝ ծամախոտը, հանրային սննդի վայրերում արգելված կլինի»,-մանրամասնեց փոխնախարարը։
Նանուշյանը վստահ է, որ մարտի 15-ից բաց և փակ սննդի օբյեկտներում ծխախոտային արտադրատեսակների օգտագործման արգելքը կկարողանան կիրառել ամբողջությամբ։ Պաշտոնյայի խոսքով՝ ծխախոտային արտադրատեսակների օգտագործման արգելքի նպատակը բնակչության առողջության պահպանումն է։
«Ուզում եմ հավաստիացնել, որ օրենքի մի շարք դրույթներ, որոնք արդեն իսկ ուժի մեջ են մտել, մեծ արդյունավետությամբ կիրառվում և վերահսկվում են։ Որպես օրինակ կարող եմ բերել ծխախոտային արտադրատեսակների հրապարակային ցուցադրության արգելքը կամ ծխախոտային տաղավարների ցուցադրության արգելքը, որոնք, դուք էլ երևի նկատել եք, խանութներում ամբողջությամբ կիրառվում է։ Այդ օրենքի կիրառումը կախված է ոչ միայն վերահսկողության լիարժեք իրականացումից, այլ նաև մեր բնակիչների գիտակցությունից և իրազեկվածության աստիճանից։ Դրա ուղղությամբ նույնպես աշխատում ենք»,- պատգամավորներին հավաստիացրեց Նանուշյանը։
Նշենք, որ հրատապ կարգով խորհրդարան բերված նախագիծը քննարկվեց առաջին և երկրորդ ընթերցմամբ։ Քվեարկության արդյունքում օրինագիծն ամբողջությամբ ընդունվեց՝ իշխանական խմբակցության 65 կողմ ձայներով։ Դեմ ձայներ չկային, իսկ ընդդիմությունից 30 պատգամավոր ձեռնպահ քվեարկեց։ «Հայաստան» խմբակցությունից ձեռնպահ քվեարկությունը հիմնավորեցին նրանով, որ իրենք առաջարկում էին նախագծի քննարկումը հետաձգել մինչև սեպտեմբերի 15-ը, սակայն դա մերժվեց։
Մերի Մարտիրոսյան
