06.06.2026 | 11:56
Արամ Դանիելյանից կբռնագանձվեն բնակարաններ, հողամասեր, մեքենաներ և 100 մլն դրամ
Փակված օդային տարածքներն ինչպե՞ս կանդրադառնան Հայաստանի վրա․ ՏԵՍԱՆՅՈՒԹ
Տնտեսություն
04.03.2022 | 18:15
Ռուս-ուկրաինական պատերազմի մեկնարկից շատ չանցած Եվրոպական երկրները փակեցին իրենց օդային տարածքը ռուսական օդանավերի համար։ Ռուսաստանի պատասխանն էլ չուշացավ՝ արգելեց 36 երկրի ավիափոխադրողների մուտքն իր օդային տարածք։ Մի քանի օր անց ԱՄն-ը ևս հայտարարեց ռուսական ինքնաթիռների համար օդային տարածքը փակելու մասին։
Ստեղծված իրավիճակում Հայաստանը կարող էր շահեկան վիճակում հայտնվեր , եթե Հայաստանը չլիներ ԵՄ սև ցուցակում։
Հայաստանը Եվրամիության սև ցուցակում է 2019-ից, երբ արգելվեց հայկական գրանցմամբ օդանավերի մուտքը Եվրոպա։ Այդ ժամանակ կոմերցիոն միջազգային թռիչքներ իրականացնում էր հայկական գրանցմամբ 8 օդանավ, այս պահին դրանց թիվը կրկնակի կրճատվել է։ Չնայած դրան, Հայաստանի քաղաքացիական ավիացիան այսօր դեռ ունի հնարավորություն տարանցիկ երկիր դառնալու, եթե քայլեր ձեռնարկի և դիմի ԵՄ-ին։
Այս պահին իրավիճակից առավելագույնս կարող են օգտվել թուրքական ավիաընկերությունները, որոնք կտանեն ռուսական ուղևորահոսքերի մեծ մասը, ասում է Հակոբ Ճաղարյանը ու հիշեցնում, նման իրավիճակ էր նաև 2019 թ-ին, երբ Ռուսաստանի նախագահի հրամանագրով դադարեցվեցին ռուս-վրացական օդային փոխադրումները ու իր անմիջական մասնակցությամբ կազմակերպվեցին Թբիլիսի-Մոսկվա ավիափոխադրումները Հայաստանի միջոցով։
Factor TV-ի նկարահանող խումբը օդանավակայանում հանդիպեց շատերին, ովքեր Հայաստան էին ժամանել Ռուսաստանից՝ հենց Վրաստան մեկնելու նպատակով։
Օդային տարածքների փակ լինելը նաև խնդիրներ կարող է ստեղծել Հայաստանից մեկնող ուղևորների համար, ասում է ավիացիոն փորձագետ Նավիկ Խաչատրյանը։
Փորձագետը նաև քիչ հավանական է համարում նոր ուղղությունների ավելացումը։ Նախ օդանավեր չունենք և կրկին խանգարում է սև ցուցակի առկայությունը։
Հայաստանի օդային տարածքում թռիչքների խտությունը դեռ չի հասել նախակովիդյան ժամանակահատվածի թռիչքների հոսքին՝ տեղեկացնում են Քաղաքացիական ավիացիայի կոմիտեից։ Եթե նախկինում օրական ավելի քան 150 տարանցիկ չվերթ էր իրականացվում, հիմա 100-ի էլ չի հասնում։ Թռիչքները ավելացել են արևմուտք-արևելք ուղղությամբ, փոխարենը Ռոստովի փակ օդային տարածքի պատճառով պակասել են հյուսիս-հարավ ուղղության թռիչքները։ Քաղաքացիական ավիացիայի կոմիտեից հայտնում են, որ այս պահին եղած հոսքերից մոտ 2 անգամ ավելի թռիչքներ կարող են սպասարկել։
Մանրամասները՝ տեսանյութում։
Սաթենիկ Հայրապետյան
