Խարկովն ամենաթեժ կետն է, մինչև ուշ գիշեր հրետակոծվել է․ հացի, ջրի, դեղորայքի խնդիր կա. ՏԵՍԱՆՅՈՒԹ

«Խարկով քաղաքը երեկ և նախորդ օրերին ակտիվորեն ենթարկվում է ծանր հրետակոծության, ավիահարվածների, և թիրախավորվում են ոչ միայն ռազմական և ադմինիստրատիվ օբյեկտները, այլև՝ բնակելի շենքեր, և բավականին շատ զոհեր կան նաև խաղաղ բնակչության շրջանում։ Հարվածները գրեթե չեն դադարում, երեկ մինչև ուշ գիշեր ռմբակոծվել են բնակելի թաղամասեր, նաև Խարկովի մարզի Իզյում քաղաքը»,- Factor.TV-ին պատմում է Խարկովում Հայաստանի պատվավոր հյուպատոսի օգնական Համլետ Հովհաննիսյանը։

Ըստ մեր զրուցակցի՝ Խարկովում բնակչությունը խուճապի է մեջ է, հացի, ջրի ու դեղորայքի լուրջ խնդիր կա․ «Բնակիչները  մասսայականորեն փորձում են լքել քաղաքը, սակայն ոչ բոլորն ունեն այդ հնարավորությունը։ Մեքենայով ճանապարհ ընկնելը դեպի Ուկրաինայի արևմտյան շրջաններ և այնտեղից Եվրոպա՝ վտանգավոր է։ Տարհանման գնացքով հիմնականում կանանց ու երեխաներին են վերցնում, բայց հերթեր են գոյացել։ Քաղաքում չի գործում տաքսի ծառայություն, շատերը հնարավորություն չուննեն իրենց թաքստոցներից դեպի կայարան գնալու, որովհետև վտանգավոր է»։

Խարկովում Հայաստանի պատվավոր հյուպատոսի օգնականը տեղեկացնում է՝ Խարկովում և Խարկովի մարզում շուրջ 20․000 հայ է բնակվում, բայց մեծ մասը քաղաքը չի լքել։

«Հիմնականում Խարկովն է թիրախավորվում ու աննախադեպ հարվածների ենթարկվում։ Չէինք պատկերացնում, որ քաղաքն այս իրավիճակում կհայտնվի․ ամենաթեժ կետն է։ Բավականին շատ բնակելի շենքեր կան խոցված, նաև, իմ տեղեկություններով, հիվանդանոցի էլ են հարվածել, և փլուզվել են մի քանի դպրոցներ»,- ընդգծեց Հովհաննիսյանը։

Նրա խոսքով՝ Եվրոպա տեղափոխված ՀՀ քաղաքացիները 14 օրվա ընթացքում պարտադիր պիտի լքեն Եվրոպան և վերադառնան Հայաստան․ «Մարդիկ ընտրում են քիչ թե շատ անվտանգ ուղղություններ, օրինակ, Խարկովի մարզից փոքր գյուղեր, եթե հեռու չեն կարող գնալ, սակայն մեծ մասը փորձում է գնալ Ուկրաինայի արևմտյան մարզեր և քաղաքներ՝ Լվով և այնտեղ որոշ ժամանակ պատսպարվելուց  հետո, առանց մուտքի վիզայի, տեղափոխվում են եվրոպական երկրներ և այնտեղից՝ ՀՀ»։

Մանրամասները՝ տեսանյութում։

Արփի Հակոբյան