06.10.2026 | 15:13
Փաշինյանն ընդունել է Հայաստանում Ֆրանսիայի նորանշանակ դեսպանին
71 կողմ, 0 դեմ. Վահագն Խաչատուրյանն ընտրվեց ՀՀ 5-րդ նախագահ. ՏԵՍԱՆՅՈՒԹ
Քաղաքականություն
03.03.2022 | 12:57
Նախագահի միակ թեկնածու Վահագն Խաչատուրյանն այսօր խորհրդարանի կողմից երկրորդ փուլով ընտրվեց ՀՀ նախագահ։ Նա ստացավ ԱԺ մեծամասնության՝ «Քաղաքացիական պայմանագիր» խմբակցության 71 կողմ ձայն, անվավեր քվեաթերթիկներ չկային։
Հիշեցնենք, որ ՀՀ նախագահի ընտրության առաջին փուլով Խաչատուրյանը չստացավ անհրաժեշտ 81 ձայները, քանի որ իշխող խմբակցությունը 71 պատգամավորով է ներկայացված խորհրդարանում։
Ընդդիմադիր «Հայաստան» և «Պատիվ ունեմ» խմբակցություններն էլ բոյկոտել են ՀՀ նախագահի ընտրության գործընթացը և չեն մասնակցում նիստին։
Հիշեցնենք. Սահմանադրության 124-րդ հոդվածի համաձայն, Հանրապետության նախագահն ընտրվում է յոթ տարի ժամկետով: Նույն անձը Հանրապետության նախագահ կարող է ընտրվել միայն մեկ անգամ:
Հանրապետության նախագահը չի կարող զբաղեցնել որևէ այլ պաշտոն, զբաղվել ձեռնարկատիրական գործունեությամբ, կատարել վճարովի այլ աշխատանք: Հանրապետության նախագահն իր լիազորությունների իրականացման ընթացքում չի կարող լինել որևէ կուսակցության անդամ:
Այժմ ՀՀ նախագահի պաշտոնակատարն է Ազգային ժողովի նախագահ Ալեն Սիմոնյանը։
Նորընտիր նախագահ Վահագն Խաչատուրյանը պաշտոնը կստանձնի ընտրվելուց հետո 10-րդ օրը։
Մերի Մարտիրոսյան
