10.10.2026 | 13:51
Ավինյանը շնորհավորել է Երևանի տոնը՝ կոչ անելով երևանցիներին դուրս գալ քաղաք և մասնակցել տոնակատարություններին
Ալիևը հայտնել է ապագայում ՌԴ-ի, Թուրքիայի և Ադրբեջանի համագործակցության եռակողմ հարթակի ձևավորման մասին
24.02.2022 | 18:50
Ռուսաստանի, Ադրբեջանի և Թուրքիայի համագործակցության եռակողմ ձևաչափը կարող է ձևավորվել մոտ ապագայում։ Այս մասին հայտարարել է Ադրբեջանի նախագահ Իլհամ Ալիևը ռուսական լրատվամիջոցների ղեկավարների հետ հանդիպմանը, գրում են ադրբեջանական լրատվամիջոցները։
«Ոչ ոքի համար գաղտնիք չէ, որ արդեն դե ֆակտո ձևավորվում է համագործակցության եռակողմ ձևաչափ։ Դեռ չի եղել ԱԳ նախարարների հանդիպում, էլ չեմ խոսում նախագահների մասին, բայց այն ձևավորվում է։ Այն ձևավորվում է ընդհանուր շահերի, պրագմատիզմի և նմանության հիման վրա»,- ասել է Ալիևը։
Նա խոսել է կառավարման համակարգերի և արժեքների ընդհանուր հատկանիշների մասին, որոնց հավատարիմ են երեք երկրները։ Այդ կապակցությամբ նա գոհունակությամբ նշել է Թուրքիայի նախագահ Ռեջեփ Թայիփ Էրդողանի և Ռուսաստանի նախագահ Վլադիմիր Պուտինի միջև «վստահելի հարաբերությունների մասին»։
«Երկուսն էլ այդ մասին հանրային խոսում են։ Կարծում եմ՝ հեռու չէ այն օրը, երբ մենք կձևակերպենք այդ հարաբերությունները։ Քանի որ Ադրբեջանը հանդիսանում է Ռուսաստանի և Թուրքիայի դաշնակիցը, ապա այստեղ հաջորդ քայլն է մոտենում։ Դա մեր գործը չէ, սակայն մենք միշտ մեր կողմից աշխատել ենք երկու երկրների շահերի մոտեցման համար»,- ասել է Ալիևը։
Նա նաև պատմական ձեռքբերում է անվանել Ռուսաստանի և Ադրբեջանի միջև կնքված դաշնակցային համագործակցության մասին նոր հռչակագիրը։
«Երկու մեծ երկրների, երկու մեծ հարևանների հետ Ադրբեջանն ունի դաշնակցային հարաբերություններ։ Էլ չեմ խոսում այն մասին, որ ՆԱՏՕ-ի անդամի և ՀԱՊԿ-ը ղեկավարող երկրի հետ։ Կարծում եմ՝ որևէ այլ երկիր չի կարող դրանով հպարտանալ։ Դա իսկապես ձեռքբերում է»,- ասել է Ադրբեջանի նախագահը։
Էմմա Չոբանյան
