16.12.2025 | 16:45
Պարույր Սևակի արձանը կհեռացվի Զանգակատան միջնակարգ դպրոցի բակից
ՔՊ-ն չի միանա Շուշիի հռչակագիրը դատապարտող ընդդիմության հայտարարությանը. Գուրգեն Արսենյան. ՏԵՍԱՆՅՈՒԹ
Քաղաքականություն
21.02.2022 | 10:11
ԱԺ Արտաքին հարաբերությունների մշտական հանձնաժողովի նիստում քննարկվում է «Հայաստան» խմբակցության հեղինակած Ադրբեջանի և Թուրքիայի խորհրդարանների կողմից «Շուշիի հռչակագրի» վավերացման կապակցությամբ հայտարարության նախագիծը։
«Քաղաքացիական պայմանագիր» խմբակցության պատգամավոր Գուրգեն Արսենյանը նշեց, որ իրենց խմբակցության պատգամավորները չեն միանա «Հայաստան» խմբակցության հայտարարության նախագծի առաջարկին, և ներկայացրեց մի քանի հիմնավորում։
Պատգամավորի խոսքով՝ 8 ամիս առաջ Հայաստանի ԱԳՆ-ն անդրադարձել է այս խնդրին հրապարակային հայտարարության և մեկնաբանության տեսքով։
«Առաջարկվող հայտարարության նախագիծը նշված հայտարարության և մեկնաբանության մեջ տեղ գտած առանցքային թեզերի գրեթե կրկնությունն է։
Հիմնավորումն առ այն, որ Հայաստանը պետք է ԱԺ նույնաբովանդակ հայտարարության տեսքով արձագանքի Թուրքիայի և Ադրբեջանի խորհրդարանների կողմից հռչակագրի վավերցմանը, տրամաբանական չէ, քանի որ խորհրդարանն ու ԱԺ-ն վարում են ու պետք է վարեն միասնական արտաքին քաղաքականություն»,- ասաց Արսենյանը։
Պատգամավորը հիշեցրեց, որ ՀՀ կառավարության ծրագրի առանցքային կետ է հանդիսանում տարածարջանում երկարատև խաղաղություն հաստատելը. «Սույն նպատակին հասնելու, ինչպես նաև գործընթացը որևէ պարագայում չվիժեցնելու համար ՀՀ իշխանությունները վարում են համապատասխան արտաքին քաղաքականություն, որում հաշվի են առնվում առկա գործընթացներից բխող բոլոր ռիսկերն ու հնարավորությունները»։
Նշենք, որ Ազգային ժողովի «Հայաստան» խմբակցության պատգամավոր Անդրանիկ Թևանյանը նախագիծը ներկայացնելիս հայտարարել էր, որ Հայաստանի խորհրդարանը պարտավոր է արձագանքել ու գնահատական տալ Թուրքիայի ու Ադրբեջանի խորհրդարանների կողմից վավերացված «Շուշիի հռչակագրին»։
Պատգամավորը ներկայացրել է ԱԺ հայտարարության տեքստի նախագիծը, որը դրվել է շրջանառության մեջ և առաջարկվում է խորհրդարանին ընդունել այն։
Ազգային ժողովն այս օրակարգով արտահերթ նիստ կհրավիրի փետրվարի 23-ին:
Մանրամասները՝ տեսանյութում:
