19.11.2024 | 23:34
Ինչ են քննարկել Հայաստանի և Գերմանիայի ԱԳ նախարարները
ԴՆԹ փորձաքննությունն ավարտվել է, բայց որոշ ծնողներ դեռ ուժ չեն գտնում մարմինները տանելու. Ավանեսյան․ ՏԵՍԱՆՅՈՒԹ
Հասարակություն
17.02.2022 | 12:17
Այսօրվա դրությամբ՝ դիահերձարաններում դեռ կան 44-օրյա պատերազմում զոհված զինծառայողների մասունքներ, որոնք նույնականացվել են, սակայն ծնողները չեն հուղարկավորում: Լրագրողների հետ զրույցում այս մասին հայտարարեց առողջապահության նախարար Անահիտ Ավանեսյանը:
«Այո, ցավոք սրտի, դեռ ունենք նման դեպքեր, երբ նույնականացումն ավարտվել է, անգամ մի քանի, կրկնվող հետազոտությունների պարագայում էլ ծնողները կամ հարազատները դեռ իրենց մեջ ուժ չեն գտնում տանելու և հուղարկավորելու։ Մենք պատկերացնում, հասկանում ենք, որ դա ցավոտ, շատ դժվար պրոցես է։ Ե՛վ ՔԿ-ն, և՛ մյուս պատկան մարմինները զբաղվում են, որպեսզի այս ընթացքը հնարավորինս արագ ավարտին բերենք»,- նշեց նախարարը:
Անդրեսայանը հավելեց, որ մարմինների, մասունքների ԴՆԹ հետազոտման, նույնականացման գործընթացն ամբողջութամբ ավարտվել է։ «Մենք ունեինք դժվար հետազոտվող մասունքներ, որոնք շատ քայքայված էին, շատ դժվար էր դրանցից ԴՆԹ առանձնացնելը: Մենք 100-ից մի փոքր ավելի մասունք ուղարկեցինք Հոլանդիա, ստացանք դրանց արդյունքները, և այդ փուլը ևս ավարտվել է։ Այս պահին, կարելի է ասել, որ մենք նույնականացման գործընթացն ամբողջովին ավարտել ենք, ներկայում հետազոտման մեջ չունենք որևէ փորձանմուշ: Սակայն, կան մասունքներ, որոնց նույնականացումն անհնար է իրականացնել։ Դրանք առանձին արխիվացած են»,- նշեց Ավանեսյանը։
Հարցին՝ դիահերձարաններում քանի՞ մարմին կամ մասունք է պահվում, առողջապահության նախարարը հրաժարվեց պատասխանել. «Թիվ չեմ կարող հնչեցնել։ Ընդհանուր թվերի հետ կապված պատկան մարմինը Քննչական կոմիտեն է, դա իրենց իրավասությունն է, ես ինձ չեմ վերապահի նման իրավասություն»:
Անահիտ Ավանեյանը վստահեցրեց նաև, որ բոլոր դիահերձարանները վերանորոգումից հետո համապատասխանում են անհրաժեշտ չափանիշներին:
Մանրամասները՝ տեսանյութում:
