Գյումրիում փլուզման մասին ահազանգեր չեն եղել, բայց մարդիկ դուրս էին եկել շենքերի բակ

Փետրվարի 13-ին, ժամը 22:25-ին գրանցված երկրաշարժը բավականին ուժգին զգացվել է Գյումրիում։ Բնակիչներից շատերն անհանգստացած դուրս են վազել իրենց բնակարաններից.փակվել են որոշ բազմաբնակարան շենքերի մուտքերի դռները։ Գյումրու որոշ թաղամասեր հոսանաքազրկվել են։ Հեռախոսակապը ևս մի պահ ընդհատվել էր,զանգել հնարավոր չէր, ըստ ամենայնի, ցանցի ծանրաբեռնվածության հետևանքով։ Factor.am-ին ԱԻՆ մամլո խոսնակ Աննա Բաղդասարյանը հայտնեց, որ Գյումրիում փլուզում չի եղել։
Շիրակի մարզպետ Նազելի Բաղդասարանը ևս գրառում է կատարել՝ տեղեկացնելով․ «Երկրաշարժը Շիրակի մարզում մեծ ուժգնությամբ զգացվել է Գյումրիում՝ բնակելի շենքերում, ինչպես նաև՝ Աշոցքի տարածաշրջանում: Աշոցք համայնքի ղեկավար Կարեն Մանուկյանի փոխանցմամբ` այս պահի դրությամբ արձանագրված փլուզումներ չկան։ Շիրակի մարզային փրկարարական վարչության պետ Ալեքսան Գյոզալյանի փոխանցմամբ` Գյումրիում ևս փլուզման ահազանգեր չեն եղել»։
Հիշեցնենք, ըստ պաշտոնական հաղորդագրության,սույն թվականի փետրվարի 13-ին, տեղական ժամանակով ժամը 22:25 -ին (Գրինվիչի ժամանակով ժամը` 18:25-ին) ՀՀ ԱԻՆ Սեյսմիկ պաշտպանության տարածքային ծառայության սեյսմոլոգիական ցանցի կողմից գրանցվել է հյուսիսային լայնության 41.19⁰ և արևելյան երկայնության 43.97⁰ աշխարհագրական կոորդինատներով Վրաստան-Հայաստան` Բավրայից 16 կմ հյուսիս-արևելք, օջախի 10 կմ խորությամբ, 5.2 մագնիտուդով երկրաշարժ: Էպիկենտրոնային գոտում ստորգետնյա ցնցման ուժգնությունը կազմել է 6-7 բալ:
Երկրաշարժը զգացվել է Շիրակի, Լոռու, Արագածոտնի մարզերում 4-5 բալ ուժգնությամբ և Երևան քաղաքում 3 բալ ուժգնությամբ:

Արմիկ Մովսիսյան