06.10.2026 | 17:37
«Կողք կողքի» միջազգային ներառական փառատոնի մասնակիցները Ազատության հրապարակում հանդես են եկել անվանի արտիստների հետ
«Անցանկալի դատավորներից» ազատվելու նոր միջո՞ց, թե՞ վեթինգ․ օրենքի փոփոխություն՝ 1 օրում․ ՏԵՍԱՆՅՈՒԹ
Հասարակություն
14.02.2022 | 13:32
Դատավորների շրջանում բողոքի ու դժգոհությունների նոր ալիք է բարձրանում․ այս անգամ ևս հակասությունը կապված է Բարձրագույն դատական խորհրդի հետ։ Օրեր առաջ ընդունված օրենքի նախագծերի փաթեթով հստակեցվում են Խորհրդի լիազորությունները։ Կարգապահական պատասխանատվության, անձեռնմխելիության հաղթահարման և այլ հարցերի քննության համար Խորհրդում այսուհետ բավարար կլինի 5 «կողմ» ձայնը՝ ներկայիս 6-ի, իսկ առանձին հարցերով՝ 7-ի փոխարեն։ Դատավորների համոզմամբ՝ օրենքն այնքան վիճահարույց է եղել, որ անգամ հանրային քննարկման չի ներկայացվել։
Օրենքի առաջին ընթերցումը դեռ ամիսներ առաջ է եղել, սակայն վերջնական փոփոխությունները, որոնք արտացոլում են նախագծի խնդրահարուց լինելը, ընդունվել են մեկ օրվա ընթացքում։
Նախագծի հեղինակները իշխանական պատգամավորներ Վահագն Հովակիմյանը և Վլադիմիր Վարդանյանն են։ Ըստ նրանց՝ առաջարկվող փոփոխությունների նպատակն է՝ ապահովել գործերի դատական քննության արդյունավետ իրականացումը, դրանց մասնակիցների իրավունքների և օրինական շահերի պատշաճ իրացումը, գործերը ողջամիտ ժամկետներում քննելու և լուծելու պահանջի ապահովումը, դատարանների բնականոն գործունեության ինստիտուցիոնալ երաշխիքների ամրապնդումը:
Այս մոտեցմանը համակարծիք է արդարադատության նախարար Կարեն Անդրեասյանը։ Այնինչ, դատավորների համոզմամբ, սա ուղիղ միջամտություն է դատավորների անկախությանը և փորձ՝ հնարավորինս հեշտ «ազատվելու» իշխանությանը ոչ հաճո դատավորներից։
Սահմանադրության համաձայն՝ Բարձրագույն դատական խորհուրդը կազմվում է 10 անձից՝ 5 դատավոր և 5 գիտնական անդամներով։ Օրենքի նոր փոփոխությունների համաձայն, փաստացի, միայն գիտնական անդամների ձայներով հնարավոր կլինի որոշում կայացնել, ինչը, ըստ դատավորների, թույլ կտա Խորհրդին առավել արագ կայացնել ցանկալի որոշումները և պատասխանատվության ենթարկել, այսպես ասած, «անցանկալի» դատավորներին։
Դեռ ամիսներ առաջ Բարձրագույն դատական խորհրդի նախագահի ժամանակավոր պաշտոնակատար Գագիկ Ջհանգիրյանի հետ քննարկման ժամանակ նախարար Կարեն Անդրեասյանն ակնարկեց, որ վեթինգն արդեն սկսվել է և դրա իրականացման մեծ մասը ԲԴԽ-ի ուսերին է։ Նախարարն այսօր ևս մնում է այդ համոզմունքին։
Մանրամասները՝ տեսանյութում։
Ռոզա Վարդանյան
