ՅՈՒՆԵՍԿՕ-ի առաքելության այցն Արցախ կկայանա՞, թե՝ ոչ

ՀՀ վարչապետ Նիկոլ Փաշինյանի, Ադրբեջանի նախագահ Իլհամ Ալիևի, Ֆրանսիայի նախագահ Էմանուել Մակրոնի ու Եվորապական խորհրդի նախագահ Շառլ Միշելի փետրվարի 4-ին տեսակապով կայացած հանդիպումից հետո ադրբեջանական լրատվամիջոցները տեղեկություններ են տարածում, թե պայմանավորվածություն է ձեռք բերվել այն մասին, որ ՅՈՒՆԵՍԿՕ-ն իր առաքելությունն ուղարկի Հայաստան ու Ադրբեջան։ Նշենք, որ Արցախյան 44–օրյա պատերազմի ավարտից հետո պաշտոնական Բաքուն ամեն կերպ խոչընդոտում է ՅՈՒՆԵՍԿՕ-ի առաքելության մուտքն Արցախ ու գրավյալ տարածքներ։ Միջազգային կազմակերպությունն էլ դեռ հստակ տեղեկություն չի տալիս առաքելության հնարավոր այցի վերաբերյալ։

«Մենք աշխատում ենք բոլոր կողմերի հետ՝ 1954 թվականի կոնվենցիայի շրջանակներում ՅՈՒՆԵՍԿՕ-ի անկախ տեխնիկական առաքելության համար պայմաններ ստեղծելու համար։ Այդ նպատակով ՅՈՒՆԵՍԿՕ-ն ողջունում է բոլոր օգտակար գաղափարներն ու նախաձեռնությունները, ինչպես տարածաշրջանային կազմակերպությունների, այնպես էլ առանձին երկրների կողմից։ Այդ տեսակետից կարող են դիտարկվել փետրվարի 4-ի հանդիպմանն առաջ քաշված գաղափարները։ Այդ գաղափարները գնահատվելու են ՅՈՒՆԵՍԿՕ-ի կողմից Հայաստանի ու Ադրբեջանի լիակատար համագործակցությամբ», – ադրբեջանական ԱՊԱ գործակալությանը պատասխանել են կառույցից։

Թվում է՝ ՅՈՒՆԵՍԿՕ-ի առաքելության այցը հնարավոր է դառնում պաշտոնական Բաքվի նկատմամբ միջազգային ճնշումների արդյունքում, այնուամենայնիվ, իրավիճակն այնքան էլ հստակ չէ։

Հիշեցնենք, որ ավելի վաղ Ադրբեջանի իշխանությունները նախագահի ու ԱԳՆ մակարդակով հայտարարում էին, որ ՅՈՒՆԵՍԿՕ-ի առաքելության այցի շուրջ բանակցությունները վերջին փուլում են, սակայն որոշ ժամանակ անց կրկին մեղադրանքներ էին հնչեցնում կառույցի հասցեին ու խոչընդոտում այցը։

Էմմա Չոբանյան