20.04.2026 | 23:38
Ովքեր են «Հանրապետություն» կուսակցության ցուցակում․ հրապարակվել են առաջին 30 անունները
76 զինծառայող է մահացել 1 տարում․ 75%-ը՝ ոչ մարտական պայմաններում․ ՏԵՍԱՆՅՈՒԹ
Հասարակություն
02.02.2022 | 17:20
Նախորդ տարի Հայաստանի և Արցախի զինված ուժերում գրանցվել է զինծառայողների մահվան 76 դեպք։ Տվյալը հրապարակել է ՀՔԱ Վանաձորի գրասենյակը 2021 թվականին Հայաստանի Հանրապետության և Արցախի Հանրապետության զինված ուժերում զինծառայողների մահվան դեպքերի վերաբերյալ տեղեկանքում։ Տեղեկությունները հավաքագրվել են զանգվածային լրատվամիջոցներով և պաշտոնական աղբյուրներով տարածված տեղեկությունների, ինչպես նաև ՀՔԱՎ-ի կողմից պաշտոնական կառույցներին ուղղված տեղեկատվության հարցումների պատասխանների հիման վրա:
2021 թվականին գրանցված մահվան դեպքերից 19-ը հրադադարի ռեժիմի խախտման հետևանք է, 17-ը պայմանավորված է եղել առողջական խնդիրներով, 15 զինծառայող մահացել է ավտովթարի հետևանքով։ Սպանության 11 դեպք է արձանագրվել․ դրանցից 3-ը որակվել է որպես 2 կամ ավելի անձանց սպանություն, 4-ը՝ մարտական ծառայության կազմակերպման կանոնների խախտում, 2-ը՝ զենքի օգտագործման կանոնների խախտում, 1-ը՝ սպանություն՝ շատերի կյանքի համար վտանգավոր եղանակով, 1-ը՝ դիտավորյալ սպանություն։ Մահվան 9 դեպքով գործ է հարուցվել ինքնասպանության կամ ինքնասպանության հասցնելու հոդվածով, 5 դեպքում մահվան պատճառ է դարձել դժբախտ պատահարը՝ ձնահյուս, կայծակնահարում և այլն:
Ըստ ՀՔԱՎ զեկույցի՝ հրադադարի ռեժիմի խախտման հետևանքով մահացած 19 զինծառայողներից 2-ը վիրավորում է ստացել 2020թ. հոկտեմբեր և նոյեմբեր ամիսներին՝ պատերազմական գործողությունների ժամանակ, բայց մահն արձանագրվել է 2021-ին։ 6 զինծառայող էլ մահացել է 2021թ. նոյեմբերին հայ-ադրբեջանական շփման գծում ծավալված ռազմական գործողությունների հետևանքով։
Բանակում տեղի ունեցած սպանության 11 դեպքերից 3-ն արձանագրվել է մեկ ամսվա՝ օգոստոսի ընթացքում, իսկ ինքնասպանության 9 դեպքերից 3-ն արձանագրվել են մայիսի ընթացքում:
Զեկույցն ամբողջությամբ՝ այստեղ։
Մանրամասները՝ տեսանյութում։
Ռոզա Վարդանյան
