Տնտեսություն
01.02.2022 | 16:07Հայաստանում սննդամթերքի գներն աճել են շուրջ 12 տոկոսով: Այս մասին այսօր հրավիրված ասուլիսի ժամանակ հայտարարեց ԿԲ նախագահ Մարտին Գալստյանը:
ԿԲ նախագահի խոսքով՝ գնաճը ունի երկու աղբյուր, որոնցից առաջինը արտաքին շուկաներից եկող գնաճն է, որը համաշխարհային ֆենոմեն է:
«Հայաստանում գնաճը 7,7 տոկոս է, ԱՄՆ-ում տարին ավարտել են մոտ 7 տոկոս գնաճով, ՌԴ-ում գրանցվել է 8,4 տոկոս գնաճ, Վրաստանում գնաճը երկնիշ թվով են չափում»,- նշեց ԿԲ նախագահը:
Նրա խոսքով՝ գնաճի երկրորդ աղբյուրը տեղական ապրանքների սեզոնային թանկացումն է: «Հայաստանում տարավերջին գնաճը կանխատեսածից ավելի քիչ է եղել՝ սեզոնային որոշ ապրանքների գների՝ բնականին մոտ մակարդակին վերադառնալու շնորհիվ։ Տարեվերջին գնաճը 9,6 տոկոսից իջավ ոչ թե մեր կանխատեսած 8,4 տոկոսի, այլ ավելի ներքև։ Ակնկալել, որ այս տարվա ընթացքում սննդամթերքի գնաճը կկրկնի 2021 թվականի վարքագիծը, կարծում եմ, մեր բազային սցենարով այդպես չէ։ Մենք ակնկալում ենք, որ սննդամթերքի գներն ավելի նվազ տեմպերով են աճելու»,- ասաց Մարտին Գալստյանը։
Նա հայտնեց նաև, որ ԿԲ-ն հաշվարկել է ջրի, էլեկտրաէներգիայի սակագների թանկացման ազդեցությունը՝ ընդհանուր գնաճի վրա։ Ջրի և էլեկտրաէներգիայի սակագների փոփոխության արդյունքում 2022 թվականին ակնկալվող գնաճը, ԿԲ գնահատականով, տարեկան կտրվածքով մոտ 0,6 տոկոս կկազմի, իսկ էլեկտրաէներգիայի թանկացմամբ պայմանավորված երկրորդային ազդեցությունները հաշվարկած՝ տարեկան գնաճը կմեծանա 1-1,5 տոկոսով։
«Ընդհանուր գնաճը, որը վերաբերում է կարգավորվող գներին, գնահատում ենք, որ կլինի մոտ 1-1,5 տոկոսի շրջանակներում՝ տարեկան կտրվածքով։
Տարեկան գնաճը կավելանա 1-1,5 տոկոսով․ այդքան կլինի կարգավորվող գների ազդեցությունը 2022 թվականի գնաճի վրա»,- պարզաբանեց ԿԲ նախագահը։
Մանրամասները՝ տեսանյութում:
