18.12.2025 | 21:24
Պաշտոնական այցերից ինչ նվերներով են վերադարձել ԱԺ նախագահը, ԱԳ նախարարն ու ԱԽ քարտուղարը
ՆԱՏՕ-ի երկրները լրացուցիչ ուժեր են ուղարկում Արևելյան Եվրոպա՝ Ուկրաինայի շուրջ իրավիճակի լարվածության ֆոնին
Քաղաքականություն
24.01.2022 | 14:21
ՆԱՏՕ-ն ուժեղացնում է իր ներկայությունը Արևելյան Եվրոպայում՝ Ուկրաինայի շուրջ ստեղծված իրավիճակով պայմանավորված։ Այս մասին ասվում է դաշինքի կայքում հրապարակված հայտարարության մեջ։
«ՆԱՏՕ-ի դաշնակիցներն ուժերը բերում են պատրաստվածության և լրացուցիչ նավեր ու ռազմական ինքնաթիռներ են ուղարկում Արևելյան Եվրոպայի տեղակայման վայրեր՝ այդպիսով ուժեղացնելով զսպումն ու պաշտպանությունը՝ Ուկրաինայի սահմաններին Ռուսաստանի ուժերի շարունակական կուտակման ֆոնին»,- ասվում է հայտարարության մեջ։
Նշվում է, որ, մասնավորապես, Դանիան ֆրեգատ է ուղարկում Բալթյան երկրներ և չորս F-16 կործանիչ՝ Լիտվա, իսկ Իսպանիան նավեր է ուղարկում, նաև դիտարկում է Բուլղարիա կործանիչներ ուղարկելու հնարավորությունը։ Ֆրանսիան հայտարարել է Ռումինիա ուժեր տեղափոխելու պատրաստակամության մասին, Նիդերլանդները երկու F-35 կործանիչ է ուղարկում Բուլղարիա, նավերն ու ցամաքային ուժերը բերվում են մարտական պատրաստվածության, իսկ ԱՄՆ-ն ուսումնասիրում է դաշինքի արևելյան թևում ռազմական ներկայության ընդլայնման հնարավորությունը։
ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ ողջունում է այդ քայլը։
«ՆԱՏՕ-ն կշարունակի բոլոր անհրաժեշտ միջոցներն ձեռնարկել՝ պաշտպանելու իր բոլոր դաշնակիցներին, ներառյալ՝ դաշինքի արևելյան թևն ամրացնելով։ Մենք միշտ արձագանքելու ենք մեր անվտանգության միջավայրի ցանկացած վատթարացման, ներառյալ՝ մեր հավաքական պաշտպանության ուժեղացման միջոցով»,- ասել է Ստոլտենբերգը։
Էմմա Չոբանյան
