10.10.2026 | 18:18
ԶՈՒ ԳՇ պետն այցելել է մի շարք զորամասեր
Լրագրողների նկատմամբ որակումները վնասում են ժողովրդավարական համակարգը. Արման Թաթոյան
Հասարակություն
22.01.2022 | 16:44
«Պաշտոնատար անձանց և, առհասարակ, բոլորին ուզում եմ զգուշացնել, որ լրագրողների նկատմամբ ընդհանրական որակումները ոչ միայն մեծացնում են կարծրատիպերը լրագրողի աշխատանքի նկատմամբ, այլև լուրջ վնասում են ժողովրդավարական և մարդու իրավունքների համակարգին», – անդրադառնալով իշխանական պատգամավոր Վահագն Ալեքսանյանի` ԱԺ ամբիոնից արած արտահայտություններին, ասել է Մարդու իրավունքների պաշտպան Արման Թաթոյանը:
Նա նաև նշել է, որ լրագրողների աշխատանքը մեծ կարևորություն ունի երկրում խոսքի ազատության խթանման գործում, և որ ինքը համակարծիք է լրագրողական կազմակերպությունների տարածած հայտարարությունների հետ: Առաջիկայում ՄԻՊ-ը պատրաստվում է զեկույց հրապարակել նաև լրագրողների աշխատանքի վերաբերյալ:
Հիշեցնենք, որ հունվարի 20-ին Ազգային ժողովի հերթական նիստի ժամանակ «Քաղաքացիական պայմանագիր» խմբակցության պատգամավոր Վահագն Ալեքսանյանը, անդրադառնալով քաղաքական ուժերի կամ գործիչների հետ ասոցացվող հեռուստաընկերությունների և առցանց հարթակների լրագրողների գործունեությանը, վերջիններիս անվանել է «վերբալ մարմնավաճառներ»։ Ընդ որում՝ մի քանի անգամ կրկնել է դրանք իր ելույթում ու վերահաստատել նաև հունվարի 21-ի նիստում։
Լրագրողական կազմակերպությունները հանդես են եկել համատեղ հայտարարությամբ՝ Վահագն Ալեքսանյանից պահանջելով ներողություն խնդրել լրագրողական համայնքից։
