18.12.2025 | 23:24
ՀՀ տարածքում ավտոճանապարհները հիմնականում անցանելի են
Իրանի նախագահը մանրամասներ է հայտնել ՌԴ կատարած այցից
Քաղաքականություն
21.01.2022 | 16:10
Մոսկվա կատարած երկօրյա այցից հետո Թեհրան ժամանելուն պես լրագրողների հետ զրույցում Իրանի նախագահ Էբրահիմ Ռաիսին հույս է հայտնել, որ այցը բեկումնային կլինի Ռուսաստանի՝ որպես բարեկամ և հարևան երկրի հետ հարաբերությունների զարգացման համար, և որ բարեկամական հարաբերությունները կօգնեն բարելավել անվտանգությունը տարածաշրջանում և ամբողջ աշխարհում, գրում է Mehr գործակալությունը։
«Այցի ընթացքում քննարկվել են Իրանի Իսլամական Հանրապետության արտաքին քաղաքականության մակրոնպատակների իրականացումը, այսինքն՝ առավելագույն փոխգործակցությունն աշխարհի երկրների, հատկապես՝ հարևան երկրների և դաշնակիցների հետ»,- անդրադառնալով Մոսկվա կատարած այցի ձեռքբերումներին՝ նշել է Իրանի նախագահը։
Մոսկվա կատարած այցի ընթացքում հիմնարար պայմանավորվածություն է ձեռք բերվել երկու երկրների՝ Իրանի և Ռուսաստանի միջև համապարփակ, կայուն և օգտակար հարաբերությունների ընդլայնման համար, ասել է նա։
«Անկասկած, Ռուսաստանի հետ հարաբերությունների զարգացումը կնպաստի երկու ազգերի անվտանգությանը և բարօրությանը»,- հավելել է Ռաիսին։
Թեհրանի և Մոսկվայի միջև երկկողմ համագործակցության ընդլայնումը, անշուշտ, անվտանգություն կստեղծի տարածաշրջանի և ամբողջ աշխարհի համար, ընդգծել է Էբրահիմ Ռաիսին։
Նրա խոսքով՝ կողմերը պայմանավորվել են հրաժարվել դոլարից փոխադարձ հաշվարկներում և երկկողմ առևտուրը հասցնել տարեկան 10 մլրդ դոլարի, ինչպես նաև ակտիվացնել Հյուսիս-Հարավ միջանցքը։
«Վլադիմիր Պուտինի հետ երեք ժամ տևած հանդիպման ընթացքում պայմանավորվեցինք համաձայնությունների արագ իրականացման շուրջ, որպեսզի երկօրյա այցը բեկումնային լինի բարեկամ ու հարևան Ռուսաստանի հետ հարաբերությունների ամրապնդման գործում»,- մեկնաբանելով Պուտինի հետ առանձնազրույցը՝ ասել է Իրանի նախագահը։
Տաթև Ֆռանգյան
