Աշխարհի ամենահարուստ մարդիկ համաճարակի ժամանակ կրկնապատկել են իրենց կարողությունը

Աշխարհի տասը ամենահարուստ մարդիկ կորոնավիրուսային համաճարակի ժամանակ, այսինքն՝ 2020 թվականի մարտից մինչև 2021 թվականի նոյեմբերն ընկած ժամանակահատվածում, կրկնապատկել են իրենց կարողությունը՝ 700 միլիարդ դոլարից հասցնելով 1,5 տրիլիոն դոլարի։ Այս մասին հետևում է Oxfam բարեգործական կազմակերպությունների ասոցիացիայի՝ Բեռլինում հրապարակված զեկույցից, գրում է DW-ի ռուսական ծառայությունը։

Բոլոր միլիարդատերերը նշված ժամանակահատվածում ավելացրել են իրենց կարողությունը՝ ի տարբերություն համաճարակին նախորդող 14 տարիների, ասվում է փաստաթղթում:

Ըստ Oxfam-ի՝ մոլորակի 55․000 ամենահարուստ մարդիկ 2019-2021 թվականներին իրենց կարողությունն ավելացրել են 14%-ով։ Համեմատության համար նշենք, որ համաշխարհային հարստությունն այս ժամանակահատվածում աճել է 1%-ով:

«Այսպիսով, անդունդն ամենահարուստների և մնացյալ մարդկության միջև կտրուկ մեծացել է»,- նշում են զեկույցի հեղինակները։

Մինչև կորոնավիրուսի համաճարակը աշխարհի բնակչության մոտ կեսը կամ 3,2 միլիարդ մարդ ապրում էր աղքատության մեջ։ Ըստ Oxfam-ի՝ մինչ օրս այս թիվն ավելացել է 160 միլիոնով։ Քանի որ ավելի աղքատ երկրների տնտեսությունները դեռ պետք է վերականգնվեն համաճարակի հետևանքներից, ամենաաղքատ 20%-ը ամենաշատն է տուժել եկամուտների կորստից:

«Միլիարդատերերի համար համաճարակը դարձել է ոսկու տենդ։ Կառավարությունները միլիարդներ են մղել տնտեսություն, բայց այդ փողի մեծ մասը մնացել է այն մարդկանց մոտ, որոնք հատկապես օգուտ են քաղում բաժնետոմսերի գներից»,- ասել է Oxfam-ի խոսնակ Մանուել Շմիտը:

Տաթև Ֆռանգյան