Սիգի ապօրինի որսի և դրա վաճառքի կանխարգելմանն ուղղված միջոցառումները շարունակվում են

Հունվարի 5-ին, ժամը 16.10-ին, ոստիկանության Վաղարշապատի բաժնում հաղորդում է ստացվել, որ Կնունյանց փողոցի սուպերմարկետի մոտ սիգ տեսակի ձուկ են վաճառում. տեղեկացնում են ՀՀ ոստիկանությունից:

Մեկնած ոստիկանները հայտնաբերել են սիգ վաճառող 44-ամյա տղամարդուն և ներկայացրել բաժին։ Տղամարդը բացատրություն է տվել, որ ձկները գնել է Երևան քաղաքի Գարեգին Նժդեհի հրապարակի տարածքից և ոստիկաններին է ներկայացրել 195 սիգ ձուկ։

Նույն օրը, ժամը 18.00-ի սահմաններում, Սևանա լճից սիգ ձկնատեսակի ապօրինի որսի կանխարգելման նպատակով, ոստիկանության Ճամբարակի բաժնի ծառայողների, ճանապարհային ոստիկանների, «Սևան ազգային պարկ» ՊՈԱԿ-ի, բնապահպանության և ընդերքի տեսչական մարմնի Գեղարքունիքի տարածքային բաժնի աշխատակիցների համատեղ միջոցառումների արդյունքում Ծովագյուղ-Շորժա-Ճամբարակ ճանապարհին տեղակայված անշարժ պահակետում ստուգվել է 46-ամյա տղամարդու վարած «Մերսեդես» մակնիշի ավտոմեքենան։ Հայտնաբերվել է ապօրինի որսած 92 սիգ։ Առգրավվել է ձկնորսական ցանց:

Հունվարի 6-ին, ժամը 12.00-ի սահմաններում, «Սևան ազգային պարկ» ՊՈԱԿ-ի արագ արձագանքման բաժնի, բնապահպանության և ընդերքի տեսչական մարմնի Գեղարքունիքի տարածքային բաժնի և ոստիկանության Սևանի բաժնի ծառայողների համատեղ ծառայության ժամանակ Ծովագյուղ գյուղի մոտակայքում հայտնաբերվել է 41-ամյա տղամարդու ձկնորսական նավակը, որի մեջ եղել է ապօրինի որսած սիգ տեսակի 10 ձուկ և ձկնորսական ցանց:

Բնությանը պատճառված վնասի չափը պարզվում է:

Բոլոր դեպքերով կատարվում է քննություն։