08.10.2026 | 13:16
Թրամփը հայտարարել է, որ Իրանի հետ պատերազմը կավարտվի «շատ շուտով»
Առուշ Առուշանյանը կմնա կալանավորված. դատարանը մերժեց գրավի դիմաց ազատ արձակելու միջնորդությունը
Հասարակություն
28.12.2021 | 11:39
Սյունիքի մարզի ընդհանուր իրավասության դատարանի Գորիսի նստավայրում Գնել Գասպարյանի նախագահությամբ քիչ առաջ հրապարակվել է Առուշ Առուշանյանի պաշտպանական կողմի միջնորդության հարցով որոշումը. դատարանը մերժել է 30 միլիոն գրավի դիմաց ազատ արձակել Գորիսի համայնքապետ Առուշ Առուշանյանին։
Նշենք՝ միջորդության հիմքում դրվել էր այն հանգամանքը, որ Լուսինե Ավետյանի ցուցմունքից հետո գործի քննությանը խոչընդոտելու ռիսկն էապես նվազել է, հետևաբար՝ Առուշ Առուշանյանի նկատմամբ ընտրված խափանման միջոցը պետք է փոխվեր։
Հիշեցնենք՝ նախաքննական մարմնի հաղորդագրության համաձայն՝ «Հայաստան» դաշինքի ընտրական ցուցակի 32-րդ համարը զբաղեցնող Առուշ Առուշանյանն իր դաշինքի օգտին առավելագույն քվեներ ապահովելու և ընտրություններում ցանկալի արդյունք արձանագրելու համար նախապատրաստել է ծանր հանցագործություն, այն է` երկու և ավելի ընտրողի կաշառք տալը։ Ըստ մեղադրանքի՝ արտահերթ ընտրություններից մի քանի օր առաջ համայնքապետը հանդիպել է Քարահունջի վարչական ղեկավար Լուսինե Ավետյանին և առաջարկել ընտրություններից հետո դրամական օգնություն տրամադրել այն ընտրողներին, ովքեր կխոստանան ընտրել «Հայաստան» դաշինքին:
Ըստ ՀՔԾ-ի՝ հանցագործությունն ավարտին չի հասցվել Առուշանյանի կամքից անկախ հանգամանքներով, քանի որ Քարահունջի ղեկավար Ավետյանը հրաժարվել է ընտրողներին հանդիպելուց և նրանց դրամական օգնության տեսքով կաշառք տալուց:
Ռոզա Վարդանյան
