Պուտինի սպառնալիքների միակ ազդեցությունը ՆԱՏՕ-ի ժողովրդականության աճն է Ուկրաինայում․ Անդրեյ Իանիտսկի

Ուկրաինացիների մեծ մասը վաղուց է հասկացել թե՛ Պուտինին, թե՛ Ռուսաստանին. մենք չենք վախենում նրա վերջնագրերից։ Factor.am-ի հետ զրույցում ասաց ծնունդով Ղրիմից ուկրաինացի տնտեսական մեկնաբան Անդրեյ Իանիտսկին՝ անդրադառնալով Ռուսաստանի նախագահ Վլադիմիր Պուտինի տարեվերջյան ամփոփիչ ասուլիսին և դրա ժամանակ Ուկրաինայի վերաբերյալ արված հայտարարություններին։

«Ռուսաստանը 2014 թվականին հարձակվեց Ուկրաինայի վրա և գրավեց նրա տարածքի մի մասը։ Մնացածն արդեն այնքան էլ կարևոր չէ։ Նրա խոսքերն ուղղված են ներքին լսարանին։ Ուկրաինացիների մեծ մասը վաղուց է հասկացել թե՛ Պուտինին, թե՛ Ռուսաստանին։ Մենք չենք վախենում նրա վերջնագրերից և ապրում ենք մեր կյանքով»,- ասաց նա։

Հիշեցնենք, որ ՌԴ նախագահ Վլադիմիր Պուտինն իր ամենամա ամփոփչ ասուլիսում պարզաբանել էր, թե ինչից կախված կլինեն իրենց գործողություններն Ուկրաինայում։

«Ռուսաստանի գործողությունները կախված կլինեն երկրի անվտանգության երաշխիքներից այսօր և պատմական հեռանկարում, այլ ոչ թե այդ երաշխիքների շուրջ բանակցությունների առաջընթացից»,- ասել էր Պուտինը՝ պատասխանելով Ռուսաստանի անվտանգության երաշխիքների և այլ պետությունների, այդ թվում՝ Ուկրաինայի վրա «հարձակվելու կամ չհարձակվելու» երաշխիքների մասին հարցին։

Անդրեյ Իանիտսկիի խոսքով՝ իրենք փորձում են հզորացնել իրենց երկիրը՝ տնտեսությունը, տեղեկատվական անվտանգությունը, պաշտպանական ուժերը։

«Պուտինի սպառնալիքների միակ ազդեցությունը ՆԱՏՕ-ի ժողովրդականության աճն է Ուկրաինայում՝ որպես ինքնապաշտպանության մեխանիզմ»,- ասաց նա։

Նա նաև նկատեց, որ չկա պատրանք, որ Ռուսաստանի հարձակման դեպքում Արևմուտքն իրենց փոխարեն կպայքարի Ուկրաինայի համար։ «Առավելագույն հնարավոր օգնությունը հետախուզական տեղեկատվությունը, զենքերի և զինամթերքի մատակարարումն է լինելու»,-եզրափակեց իր խոսքը նա։

Հռիփսիմե Հովհաննիսյան