26.11.2024 | 23:20
Ադրբեջանում պահեստազորի սպաները բողոքի ակցիա են անցկացրել՝ պահանջելով իրենց հասանելիք վճարումները
Moderna-ի ղեկավարը «օմիկրոն» շտամի պատճառով կանխատեսել է պատվաստանյութերի արդյունավետության անկում
Քաղաքականություն
30.11.2021 | 13:40
Կորոնավիրուսի դեմ պատվաստանյութերի արդյունավետությունը զգալիորեն կնվազի «օմիկրոն» նոր շտամի պատճառով, ասել է Moderna ընկերության գործադիր տնօրեն Ստեֆան Բանսելը։
The Financial Times-ին տված հարցազրույցում Բանսելը հայտնել է, որ ներկայում առկա պատվաստանյութերը շատ ավելի քիչ արդյունավետ կլինեն «օմիկրոն» շտամի դեմ, քան կորոնավիրուսի նախկին շտամերի դեպքում: Նրա կարծիքով՝ ամիսներ կանցնեն, մինչև ընկերությունները կկարողանան նոր շտամների դեմ դեղամիջոցների լայնածավալ արտադրություն ունենալ:
«Կարծում եմ՝ իրական չէ, որ արդյունավետությունը լինի նույն մակարդակի վրա, ինչպես եղավ «դելտա»-ի դեպքում։ Կարծում եմ, որ արդյունավետության զգալի անկում կլինի: Չգիտեմ, թե ինչքան (ուժեղ կլինի), քանի որ մենք պետք է սպասենք տվյալներին: Բայց բոլոր գիտնականները, որոնց հետ ես զրուցել եմ, կարծում են, որ «լավ չի լինի»»,- ավելացրել է Բանսելը:
Նա հավելել է, որ COVID-19-ի նոր շտամի փշանման սպիտակուցի մուտացիաների մեծ թիվը և Հարավային Աֆրիկայում դրա արագ տարածումը հուշում են, որ ներկայիս պատվաստանյութերը անհրաժեշտ կլինի փոխել հաջորդ տարի: Բանսելը նաև հայտնել է, որ Moderna-ն նախատեսում է 2022 թվականին արտադրել կորոնավիրուսի դեմ պատվաստանյութի երկուսից երեք միլիարդ դեղաչափ:
Փորձագետների մեծամասնությունը կարծում էր, որ կորոնավիրուսի խիստ մուտացիայի ենթարկված տարբերակը՝ «օմիկրոնը», չի առաջանա ևս մեկ կամ երկու տարի:
Ըստ Moderna-ի գործադիր տնօրենի՝ ամիսներ կպահանջվեն՝ կորոնավիրուսի նոր շտամի դեմ պատվաստանյութ ստեղծելու և մատակարարելու համար:
Տաթև Ֆռանգյան
