11.02.2026 | 22:09
Երևանի և 8 մարզի մի շարք հասցեներում էլեկտրաէներգիայի անջատումներ կլինեն
Զախարովան քննադատել է ԱՄՆ-ի կողմից «Հանուն ժողովրդավարության» գագաթնաժողովի անցկացումը՝ նշելով, որ այն միտված է առճակատման
Քաղաքականություն
25.11.2021 | 16:06
ԱՄՆ-ի կողմից դեկտեմբերի սկզբին կազմակերպվող «Հանուն ժողովրդավարության» գագաթնաժողովն ունի առճակատման ուղղություն, առաջին հերթին՝ Ռուսաստանի ու Չինաստանի նկատմամբ։ Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան, գրում է ՌԻԱ Նովոստին։
«Այդ միջոցառումը, իհարկե, ունի առճակատման, բաժանարար ուղղվածություն և իրենից ներկայացնում է Վաշինգտոնի կողմից միջազգային հարաբերությունների վերագաղափարացման ևս մի օղակ՝ կանոնների վրա հիմնված տխրահռչակ կարգի ոգու հայեցակարգով»,- ասել է Զախարովան։
Նա նաև նշել է, որ Ժողովրդավարությունը խթանելու կարգախոսի ներքո ԱՄՆ-ը հավաքում է հերթական ակումբը՝ դիմակայելու այն երկրներին, որոնք պահպանում են ռազմավարական անկախությունը հավաքական Արևմուտքից, պահպանում են աշխարհակարգի իրենց ինքնիշխան տեսլականը, առաջին հերթին՝ Ռուսաստանն ու Չինաստանը։
ՌԴ ԱԳՆ պաշտոնական ներկայացուցիչը հայտարարել է, որ ԱՄՆ-ի կողմից կազմակերպվող այս գագաթնաժողովը նպաստելու է միջազգային լարվածության սրմանը։
Նշենք, որ նախօրեին էլ ՌԴ մամուլի խոսնակ Դմիտրի Պեսկովը գագաթնաժողովն անվանել էր ԱՄՆ-ի կողմից նոր բաժանարար գծեր ստեղծելու փորձ՝ ընդգծելով, որ Ռուսաստանը դրան բացասաբար է վերաբերվում։
Հավելենք, որ դեկտեմբերի 9-10-ը, ԱՄՆ նախագահ Ջո Բայդենի նախաձեռնությամբ, անցկացվելու է «Հանուն ժողովրդավարության» գագաթնաժողով, որին մասնակցելու հրավեր է ստացել 110 երկիր, այդ թվում՝ Հայաստանը։ ՌԴ-ն, Թուրքիան ու Ադրբեջանը հրավիրված չեն գագաթնաժողովին։
Էմմա Չոբանյան
