12.12.2025 | 23:31
Պուտինի օգնականը չի բացառել պատերազմի ավարտից հետո Դոնբասի ապառազմականացումը
Նոյեմբերի 9-ին լինելո՞ւ է Փաշինյան-Պուտին-Ալիև հանդիպում Սոչիում․ ԱԳՆ խոսնակի պարզաբանումը
Քաղաքականություն
29.10.2021 | 18:07
Պաշտոնական Երևանը շարունակում է հերքել նոյեմբերի առաջին տասնօրյակում Փաշինյան-Պուտին-Ալիև եռակողմ հանդիպման մասին լուրերը։ Ռուսական Octagon media-ն այսօր տեղեկություն էր տարածել, որ Կրեմլը նախապատրաստում է ՌԴ նախագահ Վլադիմիր Պուտինի հանդիպումը Ադրբեջանի նախագահ Իլհամ Ալիևի և Հայաստանի վարչապետ Նիկոլ Փաշինյանի հետ, որը, ըստ լրատվամիջոցի, տեղի է ունենալու նոյեմբերի 9-ին Սոչիում։ «Ենթադրվում է, որ կողմերը քննարկելու են Լեռնային Ղարաբաղում ընթացիկ իրավիճակը»,- գրել էր համացանցային լրատվամիջոցը։
Հայաստանի արտաքին գործերի նախարարության մամուլի խոսնակ Վահան Հունանյանը Factor.am-ի հարցին ի պատասխան նշեց, որ հոկտեմբերի 23-ին ԱԳՆ-ի և երեկ ԱԺ-ում՝ նախարար Արարատ Միրզոյանի արված հայտարարություններին ավելացնելու ոչինչ չկա:
ՀՀ արտգործնախարարության խոսնակը հոկտեմբերի 23-ին, հիշեցնենք, արձագանքելով հայաստանյան ու ռուսաստանյան լրատվամիջոցներում շրջանառվող տեղեկությանը, թե Մոսկվայում նոյեմբերի առաջին տասնօրյակում սպասվում է Փաշինյան-Ալիև-Պուտին հանդիպում, որի ընթացքում կողմերը եռակողմ հայտարարություններ են ստորագրելու, նշել էր. «Ուզում եմ նաև ընդգծել, որ այս թեմայի շուրջ որոշ շրջանակների տարածած լուրերը ակնհայտ սադրիչ բնույթ ունեն և իրականությանը չեն համապատասխանում»։
ԱԳՆ մամուլի քարտուղարը չէր մանրամասնել, թե խոսքը մասնավորապես որ շրջանակների ու ինչ լուրերի մասին է։ Հոկտեմբերի 27-ին էլ ԱԳ նախարար Արարատ Միրզոյանն էր ԱԺ-ում թեմային անդրադարձել։ «Նախ ուզում եմ ասել, որ այս պահին որևէ հանդիպում այդ ֆորմատով նախատեսված չէ, քննարկվում են տարբեր ֆորմատներով տարբեր հանդիպումների առաջարկներ, և, ենթադրաբար, այդպիսի հնարավոր հանդիպումների արդյունքում գուցե լինի համաձայնեցված որևէ տեքստի հրապարակում», – հայտարարել էր նախարարը։
Նարեկ Կիրակոսյան
