Բարձրահարկի կառուցումն ապօրինի՞ է․ տարածքի բնակիչները հաղորդում են ներկայացրել հանցագործության մասին

Մայրաքաղաքի Դավթաշեն 3-րդ թաղամասի բնակիչները որոշել են լրատվամիջոցների օգնությանը դիմել․ առանձնատների կողքին բարձրահարկ շենքեր են կառուցվելու։ Պայքարել սկսել են դեռ երկու տարի առաջ, հիմա նորից նույն խնդրի առաջ են կանգնել։ Կառուցապատողը մեկ ամիս է՝ փորման աշխատանքներ է սկսել, նորից դիմել են պատկան մարմիններին, ասում են՝ զրո արձագանք։

Կառուցապատողը 2019 թվականին ստացել էր բարձրահարկ շենք կառուցելու թույլտվություն, բայց շինաշխատանքները կասեցվել էին, քանի որ բնակիչները դիմել էին դատարան։

Դատարանի որոշում չկա, բայց կա անկախ փորձագիտական եզրակացություն, որը հաստատում է, որ շինարարությունն այդ տարածքում հակասում է քաղաքաշինական մի շարք նորմերի։ Մասնավորապես, այս տարածքն իր նշանակությամբ դեռ 90-ականներից նախատեսված է անհատական բնակելի տների կառուցման համար, բացի այդ՝ պահպանված չէ թույլատրելի հեռավորությունը հարակից տներից։

Նույն խնդիրն առկա է նաև հարևան տարածքում՝ Դավթաշեն 9/2 հասցեում։ Բնակիչներն ասում են՝ այստեղ էլ բարձրահարկ շենք կառուցելու համար կառուցապատողն արդեն դիմել է Քաղաքաշինության կոմիտե։ Իրենց կոմիտեից են տեղեկացրել՝ հարցմանն ի պատասխան։

Թեպետ այս հատվածում դեռ շինաշխատանքներ չեն սկսել, բայց մեկնարկը սարերի հետևում չէ։ Թե ո՞վ է կառուցապատողը, առայժմ հայտնի չէ, թաղապետարանից էլ հորդորեցին գրավոր հարցում անել։ Բնակիչները նաև հանցագործության մասին հաղորդում էին ներկայացրել, հոկտեմբերի 5-ին դիմել էին Գլխավոր դատախազություն, բայց նոր միայն ստացել են պատասխան, որ գործի մասով նյութեր են նախապատրաստվում։ Մինչ բյուրոկրատական քաշքշուկն արդյունք կտա, կառուցապատողն արդեն մեկ ամիս է՝ գործի է անցել․ փորում է ու քարերը տարածքից հեռացնում։

Բնակիչները պատասխաններ ստանալու համար թաղապետարան շարժվեցին, հենց բակում նրանց դիմավորեց թաղապետարանի քաղաքաշինության և հողօգտագործման բաժնի պետ Արամ Մելիքսեթյանը։ Ասաց՝ խնդրին ծանոթ է։

Թե տարածքում ի՞նչ աշխատանքներ են արվում, Մելիքսեթյանը խոստացավ քիչ հետո իր աշխատակցի հետ տարածք մոտենալ և տեղում հասկանալ։

Մանրամասները՝ տեսանյութում։

Սաթենիկ Հայրապետյան