01.11.2024 | 23:19
Հրդեհ Գյումրու տներից մեկում
Ռուսաստանը «3+3» ձևաչափով լրջորեն իր ձեռքն է վերցնում Կովկասը, ցանկանում է Թուրքիային պոկել ՆԱՏՕ-ից ու տանել ԵՏՄ․ Ալեքսանդր Ռառ
Քաղաքականություն
19.10.2021 | 16:48
Ռուսաստանը առաջարկվող նոր՝ «3 + 3» ձևաչափով լրջորեն իր ձեռքն է վերցնում Կովկասը: Factor.am-ի հետ զրույցում նման կարծիք հայտնեց գերմանացի քաղաքական վերլուծաբան Ալեքսանդր Ռառը։
«Նրա նպատակն է՝ հաշտեցնել կովկասյան երեք երկրներին, որոնք լուրջ հակամարտությունների մեջ են միմյանց հետ: Այս երկրների միջև փակ սահմանները խոչընդոտում են հաղորդակցությանը և առևտրին, ներառյալ՝ Ռուսաստան-Թուրքիա-Իրան հարաբերությունների զարգացմանը»,- ասաց նա:
Հիշեցնենք, որ վերջերս Ռուսաստանի և Իրանի արտաքին գործերի նախարարները Մոսկվայում համատեղ մամուլի ասուլիսի ժամանակ հայտարարել էին բանակցային նոր՝ «3 + 3» ձևաչափի քննարկման մասին, որն իրենցից բացի՝ ներառելու է Հայաստանը, Ադրբեջանը, Թուրքիան և Վրաստանը:
ՌԴ ԱԳ նախարար Սերգեյ Լավրովը նշել էր՝ ձևաչափի շրջանակում քննարկվելու է տարածաշրջանում տնտեսական և տրանսպորտային ուղիների ապաշրջափակման հարցը՝ հավելելով, որ իրանական կողմը դրական վերաբերմունք է հայտնել գաղափարի վերաբերյալ:
Ալեքսանդր Ռառի խոսքով՝ Ռուսաստանը հեռանում է Եվրամիությունից՝ ելք փնտրելով դեպի Ասիա: «Նրան անհրաժեշտ են հաղորդակցության նոր ուղիներ դեպի Հայաստան և այնտեղից դեպի Իրան: Իսկ ի՞նչն է նրան խանգարում․ Վրաստանը, որը հակամարտության մեջ է Ռուսաստանի հետ և այս հակամարտության պատճառով, նաև անբարյացակամ հարաբերությունների մեջ է Ռուսաստանի դաշնակից Հայաստանի հետ: Թուրքիան ցանկանում է ավելի ամուր կապեր հաստատել Ադրբեջանի և Կենտրոնական Ասիայի հետ: Ի՞նչն է խանգարում նրան դա անել․ փակ սահմանները Թուրքիայի և Հայաստանի և Հայաստանի և Ադրբեջանի միջև»,- ասաց նա։
Ըստ Ռառի՝ ՌԴ-ն նաև ցանկանում է Թուրքիային պոկել ՆԱՏՕ-ից, տանել Եվրասիական տնտեսական միություն: «Այդ պատճառով Ռուսաստանը կօգնի Հայաստանին՝ դեպի իր արևելյան և արևմտյան հարևանները «բացվելուն»: Իրանին էլ անհրաժեշտ են Հայաստանի և Ադրբեջանի միջոցով հաղորդակցություններ Ռուսաստանի և նաև Թուրքիայի միջոցով: Հետևաբար՝ Իրանը կխաղա Ռուսաստանի և Թուրքիայի կողքին՝ կովկասյան երեք տերությունների հաշտեցման փորձերում»,- ասաց նա։
Հռիփսիմե Հովհաննիսյան
