13.12.2025 | 11:40
ԵՄ 4 երկիր դեմ է Ուկրաինային ռուսական ակտիվների հաշվին վարկ տրամադրելու ծրագրին
Հայաստանում բացվել է հոգեկան առողջության առաջին մանկական բաժանմունքը․ ՏԵՍԱՆՅՈւԹ
17.09.2021 | 20:23
Հայաստանի Հանրապետության պատմության մեջ առաջին անգամ հոգեկան առողջությամբ զբաղվող հաստատությունում բացվում է մանկական բաժանմունք։ Այն կգործի «Ավան» հոգեկան առողջության կենտրոնում։ Որոշումը կայացվել էր դեռևս 2019-ին այդ ժամանակվա առողջապահության նախախար Արսեն Թորոսյանի կողմից, թեև բաժանմունքի անհրաժեշտության մասին խոսակցությունները մշտապես են եղել։ Նախարարությունն այս տարի է կարողացել գտնել ֆինանսավորում նման բաժանմունք ունենալու համար։
Մինչ այս երեխաների բուժման համար Արմաշում է գործել ժամանակավոր առանձնացված բաժանմունք, որը, սակայն, չէր համապատասխանում անհրաժեշտ չափանիշներին․
«Մենք արդեն երկու տարի է՝ բավական նպատակասլաց կերպով աշխատում էինք, որ այսպիսի պայմաններով ստացիոնար բուժման հնարավորություններ ունենանք երեխաների համար»,- նշում է Առողջապահության նախարար Անահիտ Ավանեսյանը։
Հայաստանում քանի՞ երեխա ունի այս ոլորտի մասնագիտական բուժօգնության կարիք․ նախարարությունից նշում են, որ հստակ թիվ ասել չեն կարող, սակայն նրանք շատ են։ Առողջապահության նախարարի խոսքով՝ պատերազմը ավելի է խորացրել խնդիրը, ու, ցավոք, Հայաստանում հոգեկան առողջության խնդիր ունեցողները հասարակության մեջ հաճախ արժանանում են ոչ ճիշտ վերաբերմունքի։«Ավան» հոգեկան առողջության կենտրոնի տնօրեն Արեգա Մանուկյանն ասում է՝ երեխաների հետ աշխատելու փորձ ունեն։ Մինչ այս բաժանմունքի բացումը, նրանց բուժումն իրականացվում էր վճարովի բաժանմունքում, բայց անվճար տարբերակով։ Հոգեկան առողջության կենտրոնում բուժում ստացող 4 երեխաները կտեղափոխվեն նորաբաց բաժանմունք։
Երեխաները բաժանմունքում կստանան հիվանդանոցային ստացիոնար բուժում, հոգեկան վիճակի կայունացման դեպքում բուժումը կշարունակեն համապատասխան բժշկական կենտրոններում։ Այս բաժանմունքում ևս երեխաները կբուժվեն անվճար։Նորաբաց մանկական բաժանմունքը իր դռները կբացի երեքշաբթի օրվանից։ Այստեղ մահճակալներ նախատեսված են նաև բուժում ստացող երեխաների ծնողների համար։
Մանրամասները՝ տեսանյութում։
Արփի Հակոբյան
