19.11.2024 | 23:34
Ինչ են քննարկել Հայաստանի և Գերմանիայի ԱԳ նախարարները
Անկախության «գունագեղ» տո՞ն, թե՞ պատերազմի «դժգույն» տարելից. կարծիքներ սեպտեմբերի 21-ի համերգի մասին․ ՏԵՍԱՆՅՈւԹ
Հասարակություն
09.09.2021 | 23:14
Հայաստանի Հանրապետությունն այս տարի կնշի անկախության 30-ամյակը։ Սեպտեմբերի 21-ին Հանրապետության հրապարակում նախատեսված է տոնական միջոցառում։ Հրապարակում նախապատրաստական աշխատանքները մեկնարկել են, բեմն արդեն կառուցվում է։ Սակայն այս տարի տոնական օրվան մոտենում ենք հակասական զգացողություններով․ անկախության 30-ամյակից ընդամենը 1 շաբաթ անց լրանում է 44-օրյա պատերազմի տարելիցը։
«Սեպտեմբերի 21-ին Հանրապետության հրապարակում տեղի է ունենալու մասշտաբային և գունագեղ տոնակատարություն։ Այն, նախևառաջ, նվիրված կլինի ՀՀ անկախության, անվտանգության, ինքնիշխանության և Արցախի համար իրենց կյանքը զոհած մեր նահատակների հիշատակին»,- Կառավարության նիստում վարչապետՆիկոլ Փաշինյանի այս հայտարարությունը քննադատությունների ալիք բարձրացրեց։
Սոցիալական ցանցերում բուռն քննարկումներ ծավալվեցին, պատերազմում զոհված տղաների ծնողները սկսեցին հանդես գալ հայտարարություններով՝ դատապարտելով և պահանջելով չեղարկել միջոցառումը։
44-օրյա պատերազմում որդուն կորցրած Արմեն Ասրյանը հիշեցնում է, որ մեծ աղմուկ բարձրացավ այն բանից հետո, երբ երգիչ Անդրեն հայտարարեց Ստեփանակերտի Վերածննդի հրապարակում համերգ կազմակերպելու մասին։ Ի վերջո, համերգը չեղարկվեց։ Արցախում մինչև նոյեմբերի 11-ը մասշտաբային որևէ միջոցառում չի կազմակերպվելու, իսկ Հայաստանում պետք է որոշի ժողովուրդը, նկատում է Ասրյանը։
«Այստեղ որոշողն ու գնահատական տվողը դուք եք, եթե ուզում եք ուրախանաք, ապա գնացե՛ք, ուրախացե՛ք, բայց հազարավոր ընտանիքներ լացելու են այդ օրը։ Եթե ուզում եք զոհերին հարգել, ապա այդքանը կազմակերպեք Եռաբլուրում, որ բոլորը տեսնեն կատարվածը»,- ասում է Ասրյանը։
Արդյո՞ք մասշտաբային միջոցառում կազմակերպելու որոշումը կայացնելուց առաջ, հաշվի է առնվել քաղաքացիների կարծիքը, կո՞ղմ են, արդյոք, նրանք անկախության 30-ամյակի միջոցառմանը և մասնակցելո՞ւ են․ փորձեցինք հասկանալ հանրապետության հրապարակում մեզ հանդիպած անցորդներից։
Միջոցառումը կազմակերպում է «Դոմինո փրոդաքշն»-ը։ Ընկերության ղեկավար Աշոտ Առաքելյանը հրաժարվեց մեզ հայտնել, թե որքան գումար է հատկացվել միջոցառման կազմակերպմանը, ինչպիսի բովանդակություն է ունենալու և, ի վերջո, ինչ նկատի ունեն՝ «գունագեղ միջոցառում» ասելով։
Իրավապաշտպան Ժաննա Ալեքսանյանը կարծում է, որ զոհված զինծառայողների ընտանիքները միայնակ են զգում իրենց և մասնակից չեն Հայաստանում կատարվող իրադարձություններին, իսկ իշխանությունները կտրված են նշված ընտանիքներից։ Իրավապաշտպանը կարծում է՝ նախևառաջ անհրաժեշտ էր հաշվի առնել նրանց կարծիքը։ Նա ընդգծում է՝ կարելի էր որևէ կերպ նշել անկախության 30-ամյակը, սակայն ո՛չ գունագեղ միջոցառմամբ։
Այնինչ Ազգային ժողովի «Քաղաքացիական պայմանագիր» խմբակցության պատգամավոր Արուսյակ Ջուլհակյանը նշում է, որ պատերազմից հետո դեռ չենք վերականգնվել, սակայն Հայաստանի համար անկախացումն ամենակարևոր ձեռքբերումն է, որը միանշանակ պետք է նշվի․ նկատում է՝ կատարվածից հետո ոտքի կանգնելու համար պետք է առաջ շարժվել։
Հիշեցնենք, որ դեռևս օգոստոսին Երևանի քաղաքապետարանը որոշել էր, որ այս տարի «Էրեբունի-Երևան» տոնակատարություններ չեն անցկացվի, իսկ «Էրեբունի-Երևան»-ի համար նախատեսված ֆինանսական միջոցները կուղղվեն «100 տուն Արցախում» ծրագրի աջակցմանը, ինչպես նաև Երևանի մշակութային հաստատությունների զարգացման ծրագրերին։
Մանրամասները՝ տեսանյութում։
Արփի Հակոբյան
This publication was produced with the financial support of the European Union. Its contents are the sole responsibility of Factor TV and do not necessarily reflect the views of the European Union.
Այս հրապարակումը պատրաստվել է Եվրոպական միության ֆինանսական աջակցությամբ: Բովանդակության համար պատասխանատվություն է կրում Factor TV-ին, և պարտադիր չէ, որ այն արտահայտի Եվրոպական միության տեսակետները:
@Factor TV 2021. All rights reserved. Licensed to the European Union under conditions.
Պատրաստվել է «Եվրոպական մեդիահարթակ Հայաստանում. հուսալի և պրոֆեսիոնալ լրատվամիջոցների կառուցումը» ծրագրի շրջանակում:
