16.12.2025 | 15:36
Ճամբարակի համայնքապետին պատկանող ինքնակամ շինությունը պետք է քանդվի․ Դատախազությունը միջնորդագիր է ուղարկել
12-ամսյա բնականոն գնաճն արագացել է՝ հունիսին կազմելով 7.8%․ ԿԲ նախագահ. ՏԵՍԱՆՅՈՒԹ
Տնտեսություն
03.08.2021 | 16:12
2021թ. օգոստոսի 3-ի նիստում Կենտրոնական բանկի խորհուրդը որոշել է բարձրացնել վերաֆինանսավորման տոկոսադրույքը 0,5 տոկոսային կետով՝ սահմանելով 7 տոկոս։ 2020թ. հունիսին արձանագրվել է 0,8 տոկոս գնանկում՝ նախորդ տարվա նույն ամսվա 1,4 տոկոս գնանկման դիմաց, որի պարագայում 12-ամսյա գնաճն ավելացել է և կազմել 6,5 տոկոս։ 12-ամսյա բնականոն գնաճը ևս շարունակել է արագանալ՝ հունիսի վերջին կազմելով 7,8 տոկոս։ Այս մասին այսօր մամուլի ասուլիսում տեղեկացրեց Կենտրոնական բանկի նախագահ Մարտին Գալստյանը։
«2021թ․-ի երրորդ եռամսյակում ՀՀ հիմնական գործընկեր երկրներում ԿԲ կանխատեսումներին համահունչ շարունակվում է տնտեսական ակտիվության և համախառն պահանջարկի արագ տեմպերով աճը։
Աշխարհում կորոնավիրուսի դեմ պատվաստանյութերի լայնամասշտաբ կիրառման պայմաններում համաշխարհային պահանջարկի վերականգնման դրական սպասումներով պայմանավորված՝ հումքային և պարենային ապրանքների միջազգային շուկաներում պահպանվում է բարձր գնաճային միջավայրը… Այս իրավիճակում ԿԲ խորհուրդը արտաքին հատվածից ՀՀ տնտեսության վրա շարունակում է ակնկալել հիմնականում գնաճային ազդեցություն»,- նշեց Գալստյանը։
ԿԲ նախագահի խոսքով՝ 2021թ․-ի ընթացիկ զարգացումների համաձայն՝ ՀՀ տնտեսական ակտիվության տեմպերը որոշակիորեն գերազանցում են սպասումները՝ հիմնականում պայմանավորված գյուղատնտեսության և ծառայությունների ճյուղերի ավելի դրական զարգացումներով։
«Համախառն պահանջարկը ևս վերականգնվում է ավելի արագ տեմպերով, որին նպաստում են մասնավոր սպառման աճի պահպանվող բարձր տեմպը, արտերկրից դրամական փոխանցումների սպասվածից մեծ ծավալները:
Հաշվի առնելով արտաքին հատվածում և ՀՀ տնտեսությունում սպասվող մակրոտնտեսական զարգացումներն ու դրանից ածանցվող գնաճային ազդեցությունները՝ ԿԲ խորհուրդը նպատակահարմար է համարում շարունակել քաղաքականության տոկոսադրույքի բարձրացումը։
Միևնույն ժամանակ, խորհուրդը հետևողական լինելով ներքին պահանջարկի ավելացմանը զուգահեռ գնաճային սպասումների արագացման ռիսկերի չեզոքացմանը, դիտարկում է առաջիկայում դրամավարկային պայմանների հնարավոր խստացման անհրաժեշտությունը։ Նման պայմաններում կանխատեսվում է, որ մինչև տարեվերջ 12-ամսյա գնաճը կպահպանվի բարձր մակարդակում, այնուհետև աստիճանաբար կնվազի և կանխատեսվող հորիզոնում կկայունանան նպատակային 4 տոկոս ցուցանիշի շուրջ»,- նշեց ԿԲ նախագահը։
Մանրամասները՝ տեսանյութում:
