Քաղաքապետից մինչև պահակ․ աշխատավարձերի բարձրացման՝ ավագանու որոշումը միանշանակ չի ընդունվել․ ՏԵՍԱՆՅՈՒԹ

Երևանի քաղաքապետարանի և վարչական շրջանների ղեկավարների ու աշխատակիցների՝ թվով 2000 անձի աշխատավարձ կբարձրանա։ Այս թեմայով քննարկումն այսօր Երևանի ավագանու արտահերթ նիստի ընթացքում անցավ բուռն մթնոլորտում։

«Իմ քայլը» խմբակցության անդամ, նախագծի հիմնական զեկուցող Լևոն Հովհաննիսյանն իր ելույթում տեղեկացրեց՝ առաջարկվում է քաղաքապետարանի գլխամասի համայնքային ծառայողների աշխատավարձերը բարձրացնել մոտ 38%-ով, վարչական շրջանների աշխատակիցներինը՝ մոտ 32%-ով․ սրանք միջինացված ցուցանիշներ են։

Հովհաննիսյանը հիմնավորեց, թե ինչով է պայմանավորված բարձրացումը․ «Ցածր աշխատավարձի հետևանքով քաղաքապետարանը չի կարողանում հանդես գալ որպես մրցունակ գործատու, նկատվում է մասնագետների արտահոսք, որը բացասական ազդեցություն է թողնում Երևանի զարգացման տեսլականի վրա»։

Ավագանու ընդդիմադիր անդամը դժգոհ է նախագծից․ ըստ Անի Խաչատրյանի՝ խնդիրն այն է, որ բարձրանալու է ոչ միայն ստորին օղակի, այլև քաղաքապետարանի և վարչական շրջանների ղեկավար կազմերի աշխատավարձը։

Խաչատրյանն այդ պաշտոնյաներին խրախուսելու որևէ պատճառ չի տեսնում․ «Այս նախագիծը պատերազմական այս շրջանում այսքան հրատապ արտահերթ նիստով բերելու նախագիծ չէր, աշխատողները 2 տարուց ավելի սպասում էին այս նախագծին, 1 ամիս էլ կսպասեին, որ նախագիծը գար հերթական նիստ։ Այս նախագիծը բարոյական չէ Հայաստանում տիրող իրավիճակի առաջ, թաղապետի 400 հազարանոց աշխատավարձը դառնում է 800 հազար, ո՞ր արժանիքի համար, վարչական շրջանի ղեկավարներինը բարձրանում է 100-ից ավելի տոկոսով»։

Նախագիծն այս պահին տեղին չի համարում նաև նախկին իմքայլական ավագանու անդամ Իզաբելլա Աբգարյանը։ Չնայած դժգոհություններին՝ ավագանու՝ նախագծին ընդդիմացող անդամները շեշտում էին․ աշխատավարձի բարձրացման կարիք կա, բայց դա պետք է լինի արդարության սկզբունքով, ոչ թե կիրառվի բոլորի նկատմամբ՝ անկախ աշխատանքի արդյունավետությունից։

Այս առնչությամբ Երևանի քաղաքապետ Հայկ Մարությանը վստահեցրեց՝ աշխատակիցները գնահատվում են ըստ կատարած աշխատանքի․ «Մենք չենք հանդուրժելու մարդկանց համակարգում, ովքեր չեն ուզում աշխատել, անհավես են աշխատում, չուզելով, խնդրեմ՝ կարող եք դուրս գալ, ոչ ոք ձեզնից չի նեղանա։ Գնացեք, գտեք ձեր աշխատանքը մասնավորում, դա ձեր գործն է։ Մեզ մոտ այս պահը խստացված է»։

Մանրամասները՝ տեսանյութում։

Մերի Մարտիրոսյան