08.10.2026 | 15:39
Ահաբեկչի հանցագործությունը նույնականացվում է սովորական հանցագործության հետ. Յոլյան․ ՏԵՍԱՆՅՈՒԹ
ՍԴ-ն 1 օր ունի որոշում կայացնելու համար
Հասարակություն
16.07.2021 | 18:00
Վաղը՝ հունիսի 20-ի արտահերթ խորհրդարանական ընտրությունների արդյունքների վիճարկման գործով որոշում կայացնելու վերջին օրն է։ Սահմանադրական դատարանը պետք է որոշի կա՛մ ընտրության արդյունքները թողնել անփոփոխ, կա՛մ անվավեր ճանաչել դրանք, կա՛մ անվավեր ճանաչել և սահմանել մանդատների ճանաչման նոր կարգ, կա՛մ անվավեր ճանաչել և նշանակել ընտրությունների երկրորդ փուլ։
Արտահերթ ընտրությունների արդյունքները վիճարկելու գործով դատավարությունը Սահմանադրական դատարանում մեկնարկել էր հուլիսի 9-ին: Վեց օր շարունակ դատավարական կողմերի ելույթները լսելուց հետո, ՍԴ նախագահ Արման Դիլանյանը հայտարարարել էր, որ դատարանը հեռանում է խորհրդակցական սենյակ՝ որոշում կայացնելու։ Նիստի վերջում՝ Դիլանյանը խոստացել էր որոշման հրապարակման օրվա և ժամի մասին լրացուցիչ հայտնել, սակայն այս պահի դրությամբ՝ դեռևս որևէ տեղեկություն չկա։
Հիշեցնենք, որ «Հայաստան» և «Պատիվ ունեմ» դաշինքները, «Զարթոնք» ազգային քրիստոնեական և «Հայոց հայրենիք» կուսակցություններն ԱԺ արտահերթ ընտրությունների արդյունքները վիճարկել են հուլիսի 2-ին ՍԴ ներկայացված դիմումներով։
ՀՀ երկրորդ նախագահ Ռոբերտ Քոչարյանի ղեկավարած «Հայաստան» դաշինքը ՍԴ է դիմել 12 կետանոց դիմումով` 109 ընտրական տեղամասերի վերաբերյալ, ընտրողների շուրջ 88 000 ձայների շուրջ, որոնցից 4000-ի դիմաց, ըստ դաշինքի անդամների, ընտրողների ցուցակում բացակայում են ստորագրությունները․
Մոտ 66 հազար ընտրողների քվե կամ 7 մանդատ ստացած «Պատիվ ունեմ» դաշինքը հայտարարել էր, որ իրենց պատրաստած դիմումում անդրադարձել են վարչական ռեսուրսի օգտագործմանը, զինվորականների ուղղորդմանը, արդար և մրցակցային ընտրական պահանջները օրենքով նախատեսված խախտմանը և այլն։
Ըստ «Զարթոնք» ազգային քրիստոնեական կուսակցության՝ ոտնահարվել են ՀՀ Սահմանադրությամբ ամրագրված ընտրական իրավունքի հիմնական սկզբունքները՝ ազատությունը և հավասարությունը․ Իսկ «Հայոց հայրենիք» կուսակցության ներկայացրած դիմումը վերաբերել է միայն ընտրությունների արդյունքներն անվավեր ճանաչելուն։
Բարձրագույն ատյանը որոշել էր միավորել 4 դիմումները և քննել մեկ ընդհանուր դատական գործընթացում։
Որպես պատասխանող կողմ դատավարությանը ներգրավված էր Կենտրոնական ընտրական հանձնաժողովը, իսկ որպես հարակից պատասխանողներ՝ Դատախազությունը, Ոստիկանությունը և Հեռուստատեսության և ռադիոյի հանձնաժողովը: «Քաղաքացիական պայմանագիր» կուսակցությունը սեփական դիմումի հիման վրա ներգրավվել էր որպես երրորդ անձ:
