07.10.2026 | 16:00
2-րդ դասարանի աշակերտուհուն ծեծելու դեպքով ուսուցչուհուն ձերբակալելու որոշում է կայացվել
Դատական համակարգից դիմադրություն չեմ տեսնում. Ռուստամ Բադասյան. ՏԵՍԱՆՅՈՒԹ
Հասարակություն
08.07.2021 | 12:48
Երազանքների դատարանը բարեվարք, պրոֆեսիոնալ դատավորներից կազմված դատարանն է, որտեղ պրոցեսներն արագ են տեղի ունենում, և կա բարձր հանրային վստահություն դատական ակտերի նկատմամբ։ Այս մասին Կառավարության նիստից հետո լրագրողների հետ ճեպազրույցում նշեց արդարադատության նախարարի ժամանակավոր պաշտոնակատար Ռուստամ Բադասյանը՝ անդրադառնալով դատավորների թվակազմի ավելացմանն ու վարչապետի ժամանակավոր պաշտոնակատար Նիկոլ Փաշինյանի հայտարարությանը, թե հույս ունեն՝ համալրումներով կստանան երազանքների դատական համակարգը։
Նրա խոսքով՝ ՔՊ նախընտրական ծրագրում դատաիրավական համակարգի բարեփոխումների բոլոր ուղղությունները նշված են՝ հնարավոր սահմանադրական փոփոխություններից մինչև կոնկրետ նախաձեռնություններ, որոնք արդեն կան՝ մասնագիտացված դատարանների ստեղծում, հակակոռուպցիոն դատարանի փաթեթ։
Հարցին՝ խախտումներով աշխատած դատավորները ե՞րբ են հեռանալու, ինչպես նախընտրական քարոզարշավի ընթացքում խոստացել էր Նիկոլ Փաշինյանը, Բադասյանն արձագանքեց՝ կարգապահական վարույթները հասանելի են։
Նրա խոսքով՝ կան բազմաթիվ հարուցված կարգապահական վարույթներ, դատաիրավական բարեփոխումներն ընթանում են։
«Համակարգի ներսից անընդհատ վերարտադրվելու, դատավոր դառնալու փակ շղթան պետք է կոտրվի, դատական համակարգում նոր դատավորներ պետք է հայտնվեն։ Փակ շղթան կոտրելով՝ մենք պետք է ապահովենք նոր մարդկանց մուտքը»,- ընդգծեց Բադասյանը։
Անդրադառնալով հարցին՝ դատական համակարգի կողմից ներքին դիմադրություն կա՞, Բադասյանը պատասխանեց․ «Ես այս պահին որևէ ներքին դիմադրություն չեմ տեսնում և դրա պոտենցիալը չեմ տեսնում։ Կոշտ գործելը պետք է իմաստ ունենա, այն դեպքում, երբ օրենքը թույլ է տալիս կոշտ գործել, պետք է կոշտ գործել՝ նպատակին հասնելու համար, բայց դա ինքնանպատակ չէ»,- ասաց Բադասյանը։
Մանրամասները՝ տեսանյութում:
