18.12.2025 | 23:24
ՀՀ տարածքում ավտոճանապարհները հիմնականում անցանելի են
ԱԺ-ն հաստատեց 2020 թվականի պետական բյուջեի կատարողականը
Տնտեսություն
01.07.2021 | 13:02
Ազգային ժողովն այսօր արտահերթ նիստում հաստատեց 2020 թվականի պետական բյուջեի կատարման տարեկան հաշվետվությունը: Նախագիծն ընդունվեց 72 կողմ, 4 դեմ, 2 ձեռնպահ ձայների հարաբերակցությամբ:
Նախորդ օրը ԱԺ նիստում պետական բյուջեի կատարման տարեկան հաշվետվությունը ներկայացնելիս ՀՀ ֆինանսների նախարարի պաշտոնակատար Ատոմ Ջանջուղազյանը, մասնավորապես, ներկայացրել էր որոշ թվային ցուցանիշներ:
Ջանջուղազյանը հիշեցրեց, որ 2020-ին պետբյուջեն հաստատվել էր՝ հիմք ընդունելով 2019-ի լավատեսական արձանագրումները, սակայն համավարակը և պատերազմը փոխել են տնտեսական զարգացումների նկատմամբ սպասումները:
Հակաճգնաժամային միջոցառումների բյուջեն նախանշվել է մոտ 215 մլրդ դրամ գումարի չափով, սակայն ամբողջը չի օգտագործվել:
Տնտեսական անկումը թարմացված տվյալներով կազմել է 7.4 տոկոս: Միջին գնաճը գտնվել է կառավարելի միջակայքում, կազմել 1.2 տոկոս:
Անդրադառնալով ծրագրային ցուցանիշներին՝ նա ասաց, որ եկամուտների մակարդակը փոփոխությունների արդյունքում ճշտվել է շուրջ 141 մլրդ դրամով՝ կազմելով 1 տրլն 563 մլրդ դրամ՝ ի սկզբանե ծրագրված 1 տրլն 695 մլրդ դրամի փոխարեն: Ծախսերը ոչ միայն չեն նվազել, այլ նաև աճել են՝ 1 տրլն 989 մլրդ դրամ, դեֆիցիտը նույնպես աճել է:
Պետական պարտքը կազմել է շուրջ 7 մլրդ 969 մլն դոլար, որի շրջանակում կառավարության պարտքը եղել է 7 մլրդ 509 մլն դոլար:
