06.08.2026 | 10:30
Նիկոլ Փաշինյանը մեկնել է Ղրղզստան՝ մասնակցելու Եվրասիական միջկառավարական խորհրդի նիստին
Գիտությունների ազգային ակադեմիան նոր նախագահ ունի
28.06.2021 | 17:49
Գիտությունների ազգային ակադեմիայում այսօր՝ հունիսի 28-ին վաղ առավոտից ընտրական գործընթաց էր․ անցկացվում էին ԳԱԱ նախագահի, փոխնախագահի, ակադեմիկոս-քարտուղարի ընտրություններ:
Ակադեմիայի նախագահի պաշտոնում առաջադրված էր 3 թեկնածու՝ ԳԱԱ մաթեմատիկական և տեխնիկական գիտությունների բաժանմունքի ակադեմիկոս-քարտուղար Լենսեր Աղալովյանը, ԳԱԱ նախագահության անդամ, ակադեմիկոս Աշոտ Սաղյանը և ակադեմիկոս Էդուարդ Ղազարյանը։
Առաջին փուլում թեկնածուներից որևէ մեկը չի հավաքել բավարար թվով ձայներ։ Ավելի ուշ անցկացվել է ընտրության 2-րդ փուլ, որին մասնակցել է 1-ին փուլում ամենաշատ՝ 32 ձայն ստացած թեկնածուն՝ ակադեմիկոս Աշոտ Սաղյանը։
2-րդ փուլում Սաղյանը 55 ձայնով ընտրվել է ԳԱԱ նախագահ։ Այս մասին Factor TV-ին հայտնեցին ԳԱԱ տեղեկատվական-վերլուծական ծառայությունից։
Նախագահի ընտրությունից հետո անցկացվել է նաև ակադեմիայի փոխնախագահի և ակադեմիկոս-քարտուղարի ընտրություն։ Ըստ այդմ՝ փոխնախագահ է ընտրվել ակադեմիայի թղթակից-անդամ Հրանտ Մաթևոսյանը, ակադեմիկոս-քարտուղար՝ գիտությունների դոկտոր Արթուր Իշխանյանը։
Հիշեցնենք, որ ԳԱԱ նախագահի պաշտոնը 2006 թվականից մինչ օրս զբաղեցնում էր ակադեմիկոս Ռադիկ Մարտիրոսյանը։ Ակադեմիայից մեզ հայտնեցին, որ առայժմ պարզ չէ՝ Մարտիրոսյանը կշարունակի՞ գործունեությունը ԳԱԱ-ում, թե՞ ոչ։
Մերի Մարտիրոսյան։
