12.12.2025 | 18:37
Զելենսկին այցելել է Կուպյանսկ, որի գրավման մասին նոյեմբերի վերջին զեկուցվել էր Պուտինին. ՏԵՍԱՆՅՈՒԹ
Սննդային թունավորում ստացած բոլոր 23 հոգին դուրս են գրվել Գյումրիի ինֆեկցիոն հիվանդանոցից
28.06.2021 | 18:35
Գյումրու ինֆեկցիոն հիվանդանոցի տնօրեն Աստղիկ Բեյբությանը Factor.am-ի հետ զրույցում տեղեկացրեց, որ հաստատվել է Տավուշի մարզի Այրում համայնքից Շիրակի մարզ էքսկուրսիա եկած 43 հոգու թունավորման պատճառը։
Աստղիկ Բեյբությանի փոխանցմամբ, նրանց մոտ հայտնաբերվել է ստոֆիլակոկի հարուցիչ, սննդային թունավորում, որը եղել է նրանց օգտագործած մսամթերքից՝ քաբաբից։
Նրանք, ըստ Աստղիկ Բեյբությանի, շոգ եղանակին մոտ 5-6 ժամ ճանապարհ են անցել և , բնականաբար, մսամթերք պարունակող սննդամթերքի փչացման հավանականությունը շատ մեծ է եղել։
Հիշեցնենք, որ էքսկուրսիա եկած 43 հոգուց 23-ը հոսպիտալացվել էին՝ 16 երեխա և 7 մեծահասակ տեղափոխվել էին Գյումրու ինֆեկցիոն հիվանդանոց։
Ըստ Առողջապահության նախարարության պաշտոնական հաղորդագրության էլ, հունիսի 25-ին աղիքային վարակին բնորոշ ախտանշաններով (սրտխառնոց, փսխում և լուծ) «Գյումրու ինֆեկցիոն հիվանդանոց» է դիմել 43 անձ, որոնցից 23-ը (16 երեխա և 7 մեծահասակ) հոսպիտալացվել է:
«Դեպքի առնչությամբ իրականացված համաճարակաբանական հետազոտության արդյունքում պարզվել է, որ տուժածները Տավուշի մարզի Այրում համայնքի բնակիչներ են` 29-ը Այրումի դպրոցի 6-րդ դասարանի աշակերտներ, 14-ը՝ մեծահասակ: Խումբը նույն օրը 2 ավտոբուսով մեկնել է Շիրակի մարզ՝ էքսկուրսիա: Մասնակիցները Շիրակի մարզի «Ջարդի ձոր» կոչվող տարածքում կերել են տնային պայմաններում առավոտյան պատրաստված քաբաբ, որը պահվել է ոչ սառնարանային պայմաններում: Մանրէաբանական հետազոտության նպատակով հիվանդներից կատարվել է նմուշառում»,- գրված էր առողջապահության նախարարության հաղորդագրության մեջ:
Գյումրու ինֆեկցիոն հիվանդանոցի տնօրենը տեղեկացրեց, որ բոլորի առողջական վիճակը լավ է, վերջին երկուսը դուրս են գրվել երեկ։
Արմիկ Մովսիսյան
