08.10.2026 | 17:09
Թրամփը միջանկյալ ընտրություններից առաջ դիտարկում է Իրանի դեմ հնարավոր հարվածների հարցը․ The Atlantic
Ինչ փուլում են 6 զինծառայողի գերեվարման հարցով բանակցությունները. գերատեսչությունները պատասխանող կողմ են փնտրում․ ՏԵՍԱՆՅՈՒԹ
Հասարակություն
02.06.2021 | 20:55
Մայիսի 27-ին վաղ առավոտյան Հայաստանի տարածքից 6 զինծառայողների գերեվարումից անցել է 6 օր, իսկ գերիները դեռ Ադրբեջանում են։ Հիշեցնենք՝ նույն օրը ԶՈՒ Գլխավոր շտաբի պետի տեղակալը ասուլիս հրավիրեց և հայտարարեց, որ թշնամուն ժամանակ են տվել՝ հայ գերիներին վերադարձնելու համար։
6 օր անց ինչ փուլում են բանակցությունները․ ճշտելու համար դիմեցինք Պաշտպանության նախարարություն, որտեղից մեզ ուղղորդեցին փոխվարչապետի պաշտոնակատար Տիգրան Ավինյանի գրասենյակ։ Այստեղից էլ արձագանքեցին՝ 6 գերիների հարցով տեղեկություններ փոխանցում է Պաշտպանության նախարարությունը։ Այս գերատեսչության հետ երկրորդ անգամ կապ հաստատել այդպես էլ չհաջողվեց։
Հայաստանում Կարմիր խաչի միջազգային կոմիտեի հաղորդակցման ծրագրերի ղեկավար Զառա Ամատունին հրաժարվեց պատասխանել Factor TV-ի հարցին՝ արդյո՞ք կազմակերպությունն այս օրերի ընթացքում տեսակցել է մայիսի 27-ին Գեղարքունիքի մարզից գերեվարված 6 զինծառայողներին։ Նա նշեց միայն՝ աշխատանքներ տարվում են։
Ի դեպ՝ 6 գերիների հարցով ՄԻԵԴ-ն Ադրբեջանին վերջնաժամկետ է ներկայացրել՝ հունիսի 4-ը, հարցերին պատասխանելու համար, հայտնում է ՄԻԵԴ-ում ՀՀ ներկայացուցչի գրասենյակի՝ ՀՀ շահերի պաշտպանության վարչության պետի պաշտոնակատար Դիանա Քարազյանը։
Նա նշում է՝ ամեն դեպքում, հատկապես միջազգային արձագանքը դրական են գնահատում՝ շեշտելով՝ Եվրադատարանը վճիռ կայացնելիս հղում է կատարում նաև միջազգային հեղինակություն ունեցող կազմակերպություններին։
Ովքե՞ր են այսօր բանակցում Հայաստանի տարածքից գերեվարված 6 զինծառայողի հայրենիք վերադարձման համար, ի՞նչ փուլում են բանակցությունները, ո՞րն է լինելու հաջորդ քայլը։ Այս հարցերն անպատասխան են մնում։ Հիշեցնենք՝ 6 հայ զինծառայողները ադրբեջանցիների կողմից շրջափակվել և գերեվարվել էին մայիսի 27-ի վաղ առավոտյան, Գեղարքունիքի մարզի սահմանային հատվածում՝ N զորամասի պահպանության տարածքում ինժեներական աշխատանքներ կատարելիս։
Մանրամասները՝ տեսանյութում։
Իրինա Մկրտչյան
