17.12.2025 | 12:34
Թուրքիան որոշում է կայացրել արտաքսել ադրբեջանցի ընդդիմադիր գործչին. Բաքվում նրան սպառնում է ձերբակալություն
Բոլորիս համոզում էին, թե Սյունիքն անվտանգ է, տեսանք՝ ինչպես է անվտանգ. Արման Աբովյան
Քաղաքականություն
13.05.2021 | 17:02
Երեկ հայտնի դարձավ, որ թշնամին խախտել է Հայաստանի պետական սահմանը և Սյունիքում Սև լճի տարածքում ներխուժել է 3,5 կիլոմետր՝ Սյունիքի Սև լճի հարակից տարածքում։ Այս առնչությամբ այսօր արդեն Անվտանգության խորհրդի երկրորդ նիստն է տեղի ունենում: Բանակցություններ են ընթանում: Փաշինյանը հայտարարվում է, որ արվում է ամեն ինչ, որ թշնամին վերադառնա ելման դիրքերին:
Factor.am-ի հետ զրույցում, անդրադառնալով այս դիտարկմանը, ԱԺ ԲՀԿ խմբակցության պատգամավոր Արման Աբովյանը նշեց, որ կատարվածը սպասելի էր: «Բազմիցս զգուշացրել ենք վտանգի մասին, երբ նոյեմբերի 9-ից սկսած՝ փաստացի փլուզվեց Հայաստանի պաշտպանության սուվերեն համակարգը: Եվ այսօր ՀՀ պաշտպանության համակարգը հիմնականում կառուցված է ՌԴ թե՛ խաղաղապահների, թե՛ սահմանապահ զորքերի ներքո: Չեմ ուզում պատկերացնել, թե ինչ կարող էր լինել, եթե Սյունիքում տեղակայված չլինեին ռուս խաղաղապահ զորքերը: Խնդիրը խորքային է»,- ասաց Աբովյանը:
Անդրադառնալով շրջանառվող հակասական տեղեկություններին՝ պատգամավորն ընդգծեց. «Բոլորիս համոզում էին, թե Սյունիքն անվտանգ է, տեսանք՝ ինչպես է անվտանգ… Ադրբեջանցի խուժանը մտել է ՀՀ ինքնիշխան տարածք: Թուրքը պետք է մտնի Երևա՞ն, որ մարդիկ արթնանան: Որքան Հայաստանը կառուցողական մոտեցում է դրսևորում, այնքան թշնամին առիթից օգտվում է, խփում է և խփելու է…»:
Մանրամասները՝ տեսանյութում:
