18.12.2025 | 17:09
ՌԴ գործընկերներին խնդրել եմ շտապ զբաղվել ՀՀ տարածքում երկաթուղու որոշ հատվածների վերականգմամբ․ Փաշինյան
Ռոբերտ Քոչարյանի օրոք կրակ բռնկվեց Հայաստանում, տեղի ունեցավ Հոկտեմբերի 27. Սասուն Միքայելյան. ՏԵՍԱՆՅՈՒԹ
Քաղաքականություն
10.05.2021 | 14:03
Ռոբերտ Քոչարյանի օրոք կրակ բռնկվեց Հայաստանում, տեղի ունեցավ Հոկտեմբերի 27: Եվ այդ կրակը տարավ մի քանի կյանքեր: Եվ այդ կրակի ծխից մինչև հիմա մեր ժողովուրդը խեղդվում է: Այս մասին այսօր լրագրողների հետ զրույցում նշեց ասաց ԵԿՄ վարչության նախագահ, ԱԺ «Իմ քայլը» խմբակցության պատգամավոր Սասուն Միքայելյանը:
Անդրադառնալով դիտարկմանը, որ Քոչարյանը մեղադրում է այս իշխանությանը, որի օրոք պատերազմ է տեղի ունեցել, Միքայելյանը նշեց. «Պատերազմը մեկ-երկու օրվա բան չէ: Սպարապետից հետո մենք անպատրաստ ենք եղել պատերազմի մինչև այս իշխանությունները: Եթե այդ ժամանակահատվածում մենք Շուշիից ու Հադրութից ենք խոսում, կարելի էր Հադրութից մինչև Շուշի թունել անցկացնել՝ ասաց Միքայելյանը՝ նախորդ իշխանություններին մեղադրելով «գումարներ լափելու մեջ»:
«Բայց էլի ուշ չի, մենք պետք է գանք հենման կետի, հասկանաք՝ ինչ է կատարվել: Ես չեմ ասել՝ Նիկոլ Փաշինյանը, Սասուն Միքայելյանը մեղավոր չեն, բայց չի կարելի տարիների չարածը բարդել էսօրվա վրա: Եթե բոլոր նախագահները էն ժամանակ հասկանում էին, որ բանակցությունների միջոցով հարց չի լուծվելու, ուրեմն կա՛մ պիտի գնային ինչ-որ ճանապարհով, կա՛մ մենք պետք է պատրաստվեինք պատերազմի: Ադրբեջանը ո՞նց արեց՝ պատրաստվեց պատերազմի: Ամեն անգամ, երբ նման հարց է եղել, ես ասել եմ՝ պատերազմն անխուսափելի է: Մենք էլ պիտի պատրաստվեինք, որ ինչ-որ հակահարված տայինք»,- նկատեց Միքայելյանը:
«Ես չեմ հուսահատվում այսօր, մենք պարտություն էլ ենք կրել էն պատերազմում, հող էլ ենք տվել, բայց ես չեմ հուսահատվում, որ մի օր էլի մեր հողերը մերը կլինեն: Այսօրվա դժբախությունը հենց նրա մեջ է, որ մեր ժողովուրդն անորոշության մեջ է, չի հասկանում՝ ինչ անի: Դրա համար մեզ պետք է համախմբվել, սառը դատել ու առաջ գնալ»,- ասաց պատգամավորը:
Անդրադառնալով դիտարկմանը, թե բանակցային գործընթացը տապալվել է Փաշինյանի ժամանակ, Միքայելյանը պատասխանեց՝ բանակցային գործընթացը Փաշինյանը չի տապալել, այլ գործընթացը եկել է նախորդ իշխանությունների տարիներից և հասել այսօրվան:
«Չի կարելի էն տարիներին չարած գործը բարդել մի մարդու վրա… Այսօր եկել և ասում են՝ տվեք մեզ հնարավորություն, կանենք: Այդ հնարավորությունը տրված էր, պիտի անեին 20 տարիների ընթացքում»,- հայտարարեց Միքայելյանը:
Ինչ վերաբերում է Ռոբերտ Քոչարյանի մեղադրանքներին՝ ասաց. «Նա ամեն ինչ կարող է ասել: Էս ժողովուրդը եթե Քոչարյանին պիտի հետ բերի, չգիտեմ…»:
«Էս ազգը պիտի հասկանա և արհավիրքներից հեռու մնա»- ասաց Միքայելյանը:
Մանրամասները՝ տեսանյութում:
