31.07.2026 | 23:31
ՀԾԿՀ նախագահը այցելել է «Երևանի ՋԷԿ». քննարկվել են էներգաբլոկի ներկայիս հնարավորությունները
Օձի սևն էլ սատկի, սպիտակն էլ. երկուսն էլ պետք է հեռանան՝ օրենք գրողն էլ, չարաշահողն էլ. Մարուքյան. ՏԵՍԱՆՅՈՒԹ
Քաղաքականություն
26.04.2021 | 16:40
ՀՀ ազգային ժողովի «Լուսավոր Հայաստան» խմբակցության ղեկավար Էդմոն Մարուքյանը կարծում է, որ վարչապետի հրաժարականից հետո ժամանակավոր պաշտոնակատարի հարցի առնչությամբ պրակտիկան ձևավորվել է դեռ 3 տարի առաջ, և այսօր դրանից բողոքում են նրանք, ովքեր 3 տարի առաջ չեն վիճարկել այդ հարցը: Մարուքյանը նման տեսակետ հայտնեց ԱԺ-ում ԵԽԽՎ պատվիրակության անդամների ասուլիսում՝ անդրադառնալով լրագրողի հարցին, թե ԼՀԿ-ն ինչ է կարծում հնչող տեսակետների մասին, թե հրաժարականից հետո Նիկոլ Փաշինյանը չի կարող լինել որպես վարչապետի պաշտոնակատար:
«Պրակտիկա կա ձևավորված: 2018-ին խորհրդարանը արձակելու գործընթացը եղել է հենց այսպես: Վարչապետը տվել է հրաժարական, երկու անգամ չի ընտրվել, ու խորհրդարանն արձակվել է, ժամանակավոր պաշտոնակատարը եղել է գործող վարչապետը: Այսինքն՝ ձևավորվել է որոշակի պրակտիկա, և օրենքն այդ ձևով է մեկնաբանվել այն ժամանակ: Եվ ես չեմ հիշում, որ ընտրություններին մասնակցած որևէ ուժ վիճարկեր այդ պրակտիկան: Ըստ այդ պրակտիկայի՝ նույն բանը հիմա է արվում: Դա այն օրակարգը չէ, որ դրանով զբաղվենք»,-ասաց Մարուքյանը:
ԼՀԿ-ի համար, ըստ էության, ոչինչ չի փոխվի, եթե ժամանակավոր պաշտոնակատար լինի Նիկոլ Փաշինյանը կամ Տիգրան Ավինյանը: «Պրակտիկան եղել է այդ ձևով: Հիմա այդ պրակտիկան 3 տարի առաջ չվիճարկած մարդիկ այսօր այդ պրակտիկան ուզում են վիճարկեն: Թող վիճարկեն»,-ասաց Մարուքյանը:
ԼՀԿ ղեկավարը նկատեց, որ այդ օրենք գրողներն այսօր բողոքում են, որ իրենք գրել են օրենքներ, որոնցով այսօրվա իշխանությունն ինչ ուզում, անում է: «Այդ օրենքներն իրենք գրել էին, որ իրենք ինչ ուզեին, անեին: Թող իրենք իրենց օրենքները տանեն, ՍԴ-ում վիճարկեն: Այս իշխանությունն էլ այդ օրենքները չփոխեց 3 տարի: Դրա համար էլ ասում ենք, որ երկուսն էլ պետք է հեռանան՝ օրենքը գորղներն էլ, այդ օրենքը չարաշահողներն էլ, օձի սևն էլ սատկի, սպիտակն էլ»,- նշեց Մարուքյանը:
Մանրամասները՝ տեսանյութում:
