13.12.2025 | 22:20
Ֆրանսիան հաղթեց «Մանկական Եվրատեսիլ»-ում
Դատավորի անաչառության հետ կապված կասկած կա․ Արա Ղարագյոզյան. ՏԵՍԱՆՅՈՒԹ
Հասարակություն
22.04.2021 | 12:33
Կա տեսանյութ, կան ցուցմունքներ, և պետք է արդեն լիներ նաև դատավճիռ, բայց արդարադատություն տեղի չի ունենում: Այս մասին «Հակագազով ցուցմունք կորզելու գործ. ինչո՞ւ է ձգձգվում դատական քննությունը» թեմայով քննարկման ժամանակ նշեց տուժող Արմեն Մարտիրոսյանի ներկայացուցիչ, փաստաբան Արա Ղարագյոզյանը:
«Անհասկանալի է դատավորի պահվածքը, 3 օր առաջ այդ հիմքով ինքնաբացարկի միջնորդություն եմ ուղարկել նախագահող դատավորին: Արդեն կասկածներ ունենք, որ դատավորը խուսափում է արդարադատության իրականացունից: Դատավորի անաչառության հետ կապված կասկածներ կան»,- նշեց Ղարագյոզյանը:
Նշենք, որ 2019 թ. նոյեմբերին համացանցում հրապարակվեց 12 տարվա վաղեմության «Հայրենի ոստիկանները մահակով ու հակագազով ցուցմունք են կորզում» վերտառությամբ տեսանյութ, որտեղ երևում էր, թե ինչպես են ոստիկանները հակագազով և մահակով ցուցմունք կորզում բերման ենթարկված քաղաքացուց:
Հրապարակված տեսանյութի հիման վրա Հատուկ քննչական ծառայությունում հարուցվեց քրեական գործ ՀՀ քրեական օրենսգրքի 309-րդ հոդվածի 2-րդ մասով՝ պաշտոնեական լիազորություններն անցնելու համար, որը զուգորդվել է բռնությամբ:
Մեղադրանք առաջադրվեց ՀՀ ոստիկանության Երևան քաղաքի վարչության Արաբկիրի բաժնի քրեական հետախուզության բաժանմունքի նախկին պետ Վաչագան Ներսիսյանին և նույն բաժնի նախկին ավագ օպերլիազոր Նարեկ Սիմոնյանին, որն այժմ Ճամբարակի բաժնի պետն է, նրա լիազորությունները կասեցված են:
2020-ին գործը մտավ դատարան: Մահակով և հակագազով ցուցմունք կորզելու տեսանյութի հիման վրա հարուցված քրեական գործը մակագրվել է Երևանի ընդհանուր իրավասության դատարանի Ավան և Նոր Նորք նստավայրի դատավոր Վարդան Լևոնի Գրիգորյանին: Սակայն դատավորը հրաժարվում է քննել գործը։
Մանրամասները՝ տեսանյութում:
