18.11.2024 | 23:35
ԵՄ-ն ծրագրում է «քաղաքական առաքելություն» ուղարկել Վրաստան. Բորել
Մեդալը բերել է տաքսիստը գիշերը 11-ին և ասել՝ ես ոչ մի կապ չունեմ. վրդովված ծնողները հերքում են ՊՆ-ին․ ՏԵՍԱՆՅՈՒԹ
Հասարակություն
19.04.2021 | 21:01
Ֆեյսբուքյան օգտատեր Հասմիկ Մարտիրոսյանի երեկվա գրառումը, որ քրոջ զոհված որդու մեդալը ծնողներին հանձնել է տաքսու վարորդը, արագորեն տարածվեց համացանցում։
Դեռ երեկ Factor TV-ին պարզաբանում խնդրեց Պաշտպանության նախարարությունից, որտեղից ասացին՝ զբաղվում են խնդրով՝ հասկանալու համար, թե որն է եղել միջադեպի պատճառը։ Այսօր արդեն ՊՆ-ն հաղորդագրություն է տարածել, որում ասվում է, որ այդ գրառումն իրականության հետ որևէ աղերս չունի՝ մանրամասնելով․ Ռոբերտ Կարապետյանի՝ ոչ թե «Արիության համար», այլ՝ «Մարտական ծառայություն» մեդալը հարազատներին է հանձնել ոչ թե տաքսու վարորդը, այլ լեյտենանտ Էդգար Ապրեսյանը, որը մարտական գործողությունների ժամանակ եղել է այն ստորաբաժանմանն աջակցող դասակի հրամանատարը, որի անձնակազմից է եղել Ռոբերտ Կարապետյանը: Նախարարությունից նաև նշում են, որ լեյտենանտ Ապրեսյանը ցանկացել է մեդալը զոհված զինծառայողի հարազատներին հանձնել իրենց տանը, սակայն մերժում ստանալուց հետո այն հանձնել է զինծառայողի շիրմի մոտ՝ նրա հորը:
Ռոբերտ Կարապետյանի մայրը՝ Նառա Եղիազարյանն էլ իր հերթին Factor TV-ի հետ զրույցում հակադարձեց՝ Պաշտպանության նախարարության տարածած հաղորդագրությունն իրականության հետ ոչ մի աղերս չունի։
Մայրը Պաշտպանության նախարարությանը նաև հարց է ուղղում՝ կեսգիշերին մոտ ծնողի հետ կապվելը նույնպե՞ս պարգևների հանձնման արարողակարգի բաղադրիչ է: Իրավապաշտպան Ժաննա Ալեքսանյանը զինծառայողների իրավունքների պաշտպանությամբ զբաղվում է 1990-ականներից։ Ասում է՝ արատավոր այդ երևույթը նոր չէ։
Ժաննա Ալեքսանյանը նշում է՝ դեռևս հրապարակային ցավակցական խոսք էլ չի հնչել։
Ի դեպ՝ նման վերաբերմունքի մասին օրեր առաջ Factor TV-ն կրկին բարձրաձայնել էր․ պատերազմում զոհված ժամկետային զինծառայող Գառնիկ Անտոնյանի հորը նույնպես որդու մեդալը տաքսիով էին ուղարկել։ Արմեն Անտոնյանը մոտ 1 ամիս սպասելուց հետո նամակով դիմել է նախագահ Արմեն Սարգսյանին, որից 2 օր անց զանգահարել են համայնքապետարանից ու կանչել մեդալը ստանալու։
Զոհված տղաների համար կազմակերպված մեդալների հանձման արարողությունն է, տեսանյութը Գառնիկ Անտոնյանի ընտանիքն է տրամադրել։ Ծնողներն ասում են՝ այդպիսի օրինակները շատ են։ Շատերը նույնիսկ որդիների զոհվելու մասին մանրամասներ չեն կարողանում իմանալ։ Ռոբերտ Կարապետյանի մայրը նշում է՝ մինչ օրս տեղեկություն չունեն, թե իրենց որդին որտեղ, ինչ հանգամանքներում ու երբ է զոհվել։
Սգավոր ծնողները պատկան մարմիններին հիշեցնում են՝ ամենաթանկն են տվել հայրենիքին ու շեշտում՝ արժանի վերաբերմունք չեն խնդրելու։
Մանրամասները՝ տեսանյութում։
Իրինա Մկրտչյան
